Казни за лошиот асфалт на улицата пред „Рамстор“

Градоначалникот Коце Трајановски вчера призна дека улицата пред „Рамстор“, со која започна таканаречената ренесансната акција за обнова на градските улици, е неквалитетно санирана. Надзорот утврдил дека новиот асфалт на места отстапува од очекуваниот квалитет на изведба, поради што изведувачот ќе биде казнет. Но, и покрај тоа, градските власти не планираат „Мито Хаџи Василев-Јасмин“ повторно да ја раскопуваат за конечно да биде подновена како што треба.

„Констатирано е дека има отстапувања, но во дозволени рамки. Не се работи за оној квалитет што го посакуваме и затоа ќе има одредени казнени поени за изведувачот. За останатите обновени улици, надзорот се' уште е во тек“, информираше вчера Трајановски и објасни дека изведувачот „Бауер БГ“ ќе биде парично казнет, но не знаеше да каже колкава ќе биде казната, или приближно колку помалку ќе му се исплатат од договорената зделка за сработеното.

Инаку, токму „Бауер БГ“ е една од поангажираните фирми за изведба на градските проекти. Освен за санација на „М.Х.Јасмин“, таа во ренесансната акција за обнова на улиците беше ангажирана на уште една улица, а истата фирма по налог на Градот Скопје моментално работи и на реконструкција на мостот „Гоце Делчев“. (Дс.Т.)