Нема интерес за распределители по радијатори

Корисниците не се заинтересирани да плаќаат ниту на 18 рати за 300 евра по стан

Корисниците на парно не се многу заинтересирани за поставување топлински распределители во домовите. Причината е едноставна - треба од џеб да извадат по 50 евра од радијатор. Оттаму куќните совети имаат проблем да најдат 80 отсто станари заинтересирани за нивно поставување, без што системот не може да функционира. Овој услов им претставува пречка и на оние што сакаат нареднава грејна сезона да ги имаат ваквите мерни уреди. Со нив корисниците ќе можат да ја плаќаат потрошената топлинска енергија на ниво на стан и истовремено да штедат.

Годишната заштеда што ќе ја остварат граѓаните преку парното изнесува од 62 до 115 евра, а ќе зависи од тоа колку ќе штедат. Ова го потврдија и пилот-проектите, кои во изминатата грејна сезона ги реализираа „Снабдување Исток“ и „Снабдување Запад“. Пилот-проектот што го спроведе „Снабдување Исток“ беше финансиран од фирмите „Техем“, производител на топлински распределители, и „Данфос“, производител на термостатски вентили. Проектот го реализираше на објект со ��сум стана и еден деловен потрошувач, додека „Снабдување Запад“ на вкупно 85 стана во седум згради во општина Карпош. Инвестицијата по стан за секој корисник е околу 300 евра, а снабдувачите нудат и можност за плаќање од 12 до 18 рати. Но, и покрај поволностите, заинтересирани нема.

„Опремата што ја поставивме во седум згради на различни локации во Карпош сега ќе мора да ја демонтираме, или ако станарите се заинтересирани, ќе треба да ја платат. И покрај можноста сумата да се плати на 18 рати, интересот е слаб, дури и никаков. Дали ќе инсталираме ваков тип опрема или не, нам ни е сеедно, бидејќи ние и натаму можеме да наплаќаме по мерач во потстаница. Но, со поставувањето на топлинските распределители, корисниците добиваат можност не само да штедат, туку и да се заштитат од соседите што им крадат енергија преку радијаторите монтирани на доградените тераси“, објаснува Методија Стојчев, директор на „Снабдување Запад“. (Сн.К.)