Наместо по бетон, ќе газиме на бехатон

Градоначалникот вчера најави почеток на голема акција за обнова на тротоарите, засега само во Центар

Деспина Трајковска



Ренесансната акција од градските улици од вчера се префрли на тротоарите. Градските власти најавија голема акција за обнова на тротоарите и пешачките патеки во централното градско подрачје. Планирано е илјадници квадрати бетон да се замени со бехатон и друг вид типски плочи, наместа во разни бои, по површина и колорит во зависност од локацијата. За таа намена, Градот ќе потроши околу 600.000 евра. Акцијата стартуваше вчера со тротоарите на булеварот „Гоце Делчев“, на потегот од истоимениот мост до Универзитетска библиотека.

Градоначалникот Коце Трајановски најави дека освен на овој потег, акцијата во овој бран ќе ги опфати и тротоарите на булевар „Партизански одреди“ пред Соборниот храм, како и оние во реонот на паркот „Жена-борец“.

„Ова, всушност е прва фаза од планираниот обемен проект за која ќе потрошиме околу 600.000 евра. Во меѓувреме ќе направиме пресметки и анализи за да утврдиме дали има потреба од санација на тротоари и на други булевари. Имено, во оваа фаза ќе се реконструираат тротоарите само во Центар, оти утврдивме дека тие се во најлоша состојба, а веројатно акцијата во иднина ќе се прошири и по другите населби бидејќи има критични делови особено околу раскрсниците и кај семафорите“, истакна вчера Трајановски и посочи дека од локацијата ќе зависи со каква боја бехатон-плочи ќе биде заменет бетонскиот тротоар.

Првата фаза од акцијата ќе ги опфати тротоарите на булеварот „Гоце Делчев“, оние од хотелот „Холидеј ин“ до мостот „Гоце Делчев“, а ќе се работи и на булеварот „Партизански одреди“ во реонот на Соборниот храм. Исто така, ќе се обновуваат и тротоарите на булеварот „ВМРО“ од мостот „Гоце Делчев“ до „Партизанска“ и на булеварот „Даме Груев“ од „Партизанска“ до ТЦ „Палома Бјанка“. За две недели, пак, планирано е да почне обновата на тротоарите на улицата „Васил Аџиларски“ од републичкото Собрание до хотелот „Холидеј ин“ и на улицата „11 Октомври“ на дел пред паркот „Жена-борец“. Акцијата на терен ќе ја реализираат екипи на ИГМ „Вратница“, „Урбан инвест“ и „Чингар инженеринг“.