Уставните измени одложени на неопределено

Гласањето за уставните измени во делот на Судскиот совет е одложено на неопределено време, поради тоа што парламентарното мнозинство вчера не успеа да обезбеди присуство на најмалку 80 пратеници, колку што се потребни гласа за пристапување кон промена на Уставот. Иако владејачката коалиција во парламентот е застапена со 82 пратеника, вчера недостигаа пет пратенички гласа за да се постигне двотретинско мнозинство за предлогот на ВМРО-ДПМНЕ - министерот за правда да не биде член на Судскиот совет.

Отсутен од Собранието и овој пат беше лидерот на ДУИ, Али Ахмети, чија партија побара во пакетот уставни измени да се предвиди и Бадентерово мнозинство при разрешувањето на судиите и при одлучувањето во Уставен суд.

Расправата за предложените корекции на Уставот почна и покрај тоа што речиси цела опозиција е надвор од Собранието. (П.Р.)