Економијата ќе ја пикнат во вакуум

На странски инвестиции не треба да се надеваме додека не се стабилизира политичката состојба

Маја Томиќ


Македонската економија ќе биде на стендбај додека не завршат изборите, за кои станува се' поизвесно дека ќе се случат оваа пролет. Таа ќе биде заложник на изборниот кошмар што се заканува да ја зафати наскоро со целата своја жестокост.

Стопанствениците оценуваат дека предвремени парламентарни избори не се добри за економските текови, затоа што на земјата, особено по кризата, и' е потребен побрз развој, а не замирање на активностите, што се очекува да се случи доколку државата се реши на ваков чекор. Додека банкарите се крајно воздржани од каков било коментар на тема избори - економија, од бизнисот велат дека прашањето како ќе влијаат изборите врз домашната економија, до некаде е излишно, бидејќи се знае дека епилогот ќе биде негативен. Според бизнисмените, од толку многу политика во изминатите 20-ина години економијата не може да мрдне напред, а под прашање и сега се ставаат проекциите за ра��вој оваа година, која беше најавувана од Владата како инвестициски многу активна.

„Сигурно дека изборите ќе имаат негативни импликации, бидејќи секогаш било така. Од премногу политика сме дојдени до ова дереџе. Само назадуваме наместо да одиме напред. Изборниот процес не е толку краток, а додека трае, ќе нема парламент, ќе нема носење закони, одлуки, нема да може да се инвестира и да се реализираат плановите... ќе се влечеме со месеци и така се вртиме во круг со години. Само се надмудруваме кој да дојде во политиката, а каде е стопанството? Како во вакви услови да живеат фирмите, граѓаните, чиј стандард постојано се влошува?“, револтирано вели еден познат стопанственик, кој сака да остане анонимен.

Митко Алексов од Сојузот на стопански комори посочува дека забавувањето на економските активности е нормална појава во предизборни и во изборни времиња. Така било досега, но така е и во сите други земји.

„Интензитетот на економските активности, секако, ќе биде во мирување додека не завршат изборните процеси. Сите ќе чекаат на исходот, посебно странските инвеститори. И тие што сакале оваа пролет да вложат кај нас, најверојатно, ќе ги одложат плановите, затоа што ако се смени власта, можно е да се сменат и условите за инвестирање, висината на даноците, на пример“, изјави Алексов.

Од Стопанската комора на Македонија посочуваат дека немаат изградено официјален став за тоа какво ќе биде влијанието на изборите врз домашната економија. Велат дека нема да има стопирање на сите активности, но дека тие сигурно ќе бидат забавени. Според досегашното искуство од перидот на избори, на нов прилив на инвестиции однадвор, најверојатно, ќе почекаме. Фирмите ќе си ги тераат тековните обврски, но и нивните инвестициски активности, планови и проекти ќе одат со забавено темпо, оценуваат од Комората.

На иста линија на размислување се и економските експерти.

„Реално е во услови на избори, сите динамики, во секоја сфера на економијата, да одат побавно. Кога станува збор за силни економии, тогаш е поинаква состојбата, но во нашата поспецифична, мала економија, повеќе се чувствуваат политичките удари. Можно е поради изборите да има вакуум на странските инвестиции затоа што ќе се чека прво да се дефинира политичката клима. Ќе има промени и во домашните финансиски и реални инвестиции. Домашните компании сигурно ќе бидат внимателни во овој период при остварувањето на плановите и на проекциите. Изборите носат опасност за ценовната стабилност, затоа во такви условите е потребно монетарната власт да ја држи под контрола инфлацијата“, оценува Зоран Ивановски од Европски универзитет.