Македонците јадат, пијат и пушат најевтино во Европа

Ако може да им послужи како некаква утеха што примаат најмали плати, Македонците, дефинитивно, плаќаат најниски цени за храна и за пијалаци во цела Европа, но и пушат најевтини цигари. Вака барем покажало најновото истражување на статистичката служба на Европската унија, Евростат, објавено вчера.

Поконкретно, цените на прехранбените стоки и на безалкохолните пијалаци во Македонија се за дури 48 отсто пониски од просечните во Европската унија. Гледано по групи, цените на лебот и на житарките се за 52 процента под европскиот просек, а цените на месото се пониски за 49 проценти. Потоа цените на млекото, сирењето и на јајцата се под просекот на ЕУ за 40 отсто.

Македонците пијат и најевтин алкохол од сите земји во Европа. Па така, податоците на Евростат покажале дека цените на алкохолните пијалаци во Македонија се за 31 отсто пониски од просекот во ЕУ.

И кога станува збор за цигарите, анализите на Евростат покажале дека тие во нашата држава, исто како и во Србија и во Црна Гора, се убедливо најниски во Европа. Поточно, цените на цигарите во овие три држави се за дури 70 отсто пониски од просечните цени во ЕУ, па оттаму и не зачудува зошто Македонците, Србите и Црногорците секогаш се наоѓаат на врвот на листите на нации што се најстрасни пушачи во Европа. Само малку повисоки цени на цигарите од нас имаат Босанците и Албанците, така што цените во тие држави се за 67 отсто пониски од просекот во ЕУ.

Ако во другите сегменти правиме споредба со Србите, кај нив цените на прехранбените про��зводи и на безалкохолните пијалаци се за 30 отсто пониски од европскиот просек. Нашите северни соседи пијат многу поскап алкохол од нас, бидејќи цените на алкохолните пијалаци во таа земја се за само 10 отсто пониски од европскиот просек.

Кога станува збор за храната, во другите земји од регионот цените се повисоки во однос на Македонија. Па така, во Албанија цените на прехранбените стоки се за 28 отсто пониски од европскиот просек, во БиХ се пониски за 23 проценти, а во Црна Гора за 21 отсто. Бугарите, пак, иако се членки на Европската унија, јадат прилично евтина храна, односно нејзините цени се за 32 отсто пониски од европскиот просек. Во Грција храната е значително поскапа, па цените се дури за еден процент повисоки од просечните во ЕУ.

Инаку, најновото истражување на Евростат покажа дека цените на прехранбените стоки и на безалкохолните пијалаци во државите од Европската унија се највисоки во Данска, и тоа за дури 39 отсто повисоки од просечните во Унијата. Од членките на ЕУ цените на храната и на безалкохолните пијалаци се најниски во Полска и тоа за 36 отсто под европскиот просек, па следува Романија со цени пониски за 34 отсто од европскиот просек.

Во анализата се земени предвид цени на околу 500 прехранбени продукти и безалкохолни пијалаци.

По Данска, според скапотијата на прехранбените производи, следува Ирска, со цени повисоки за 29 отсто од европскиот просек, па Финска со 20 отсто повисоки цени и Луксембург со цени повисоки за 17 отсто од просечните во ЕУ.

Инаку, пример за тоа како една држава преку цените треба да се бори против алкохолизмот и пушењето е Норвешка каде што цените на алкохолните пијалаци се за дури 134 отсто повисоки од европскиот просек, а на цигарите за 119 проценти над просекот. Но, затоа жителите на Норвешка, која не е членка на ЕУ, плаќаат и премногу скапи храна и пијалаци, така што нивните цени се за дури 54 отсто повисоки од просекот на ЕУ и убедливо највисоки во Европа. (Н.Н.Ф.)