Кривични пријави за СДСМ поради „Злетовица“

КОЧАНИ - „СДСМ води тенденциозна и параноична кампања, без факти, со фабрикувани лаги и небулози“, обвини на вчерашната прес-конференција директорот на Хидросистемот „Злетовица“ во Пробиштип, Стојан Миланов. Откако информира дека со случајот е запозната и Антикорупциска комисија, Миланов најави дека ќе биде поднесена кривична пријава против СДСМ и против нејзините портпароли.

„Ги разбираме СДСМ дека се во паника и го користат нападот како најдобра одбрана. Сакаме да ги потсетиме на нивното незаконито, недомаќинско и неодговорно работење“, рече Миланов.

Притоа постави неколку прашања до СДСМ, зошто го распишале тендерот без основен и ревидиран проект, без градежна дозвола, зошто не е распишан тендер за рехабилитација на пробиштипскиот цевковод и зошто во преговорите со јапонската банка „Џајка“ водени од СДСМ не биле предвидени и обезбедени средства за изградба и доопремување на филтер-станиците.

Директорот Миланов нагласи дека првата фаза на проектот „Злетовица“ е во завршна фаза. Во контекст на обвинувањата од СДСМ, тој посочи дека како подизведувач на конзорциумот „Бетон/Гранит“ е ангажирана фирмата „Силекс неметали“н со која конзорциумот на изведувачи склучил договор, а дека навремено и квалитетно ја завршила работата.

„Оваа фирма работеше на пробивање на двата тунела на браната ‘Кнежево‘ во должина од околу 500 метри и ископа 1 милион и 500 илјади кубни метри насипен материјал за вградување на телото во браната. Пред инвеститорот одговорноста за квалитетот и навременото извршување на работите ја носи само исклучиво изведувачот, а не подизведувачот.

Секоја исплата на финансиски средства на изведувачите се контролира и се одобрува од јапонската банка ‘Џајка‘, објасни Миланов.

Јоиро Имазава, тим-лидер на консултантски тим на јапонската Агенција за меѓународна соработка, рече дека во изминатите три години изградбата на браната е задоволителна и мошн�� брза. „Изградени се 80 километри цевковод до соседните општини и остануваат мали ситници. За шест до седум месеци работите на ‘Злетовица‘ од првата фаза, за која има доволно пари, ќе бидат завршени. Тоа значи дека ќе биде изграден локален пат за жителите и ќе се решат одредени еколошки проблеми“, појасни Имазава. (МИА)