Потврдена затворската казна од три години за Петра Митева

Скопскиот Апелационен суд донел решение со што ја одбил жалбата на ексдиректорка на УЈП, а по изречената првостепена пресуда

Љубиша Станковиќ

Апелациониот суд во Скопје донел решение со кое и' се одбива жалбата на поранешната директорка на Управата за јавни приходи, Петра Митева. Со тоа е потврдена пресудата на првостепениот суд, кој уште пред повеќе од две години ја осуди на затворска казна во траење од три години. Бранителите на Митева имаат право да поднесат жалба на ова решение, но правната битка е речиси исцрпена. Единствената шанса да добие ново судење е барањето до Врховниот суд за уште едно вонредно преиспитување на најновата пресуда.

Случајот „Митева“ е еден од оние ретки предмети што доживеаја пререферирање во највисокиот суд во државата, кој пред повеќе месеци еднаш веќе решавал и донел поинаква одлука во корист на осудената. Но, со оглед на тоа што не беше напишана одлуката, случајот повторно е отворен, а епилогот сосема различен од претходното гласање. Во судската практика ќе остане запаметен како случај на „судско тактизирање“.

Ексдиректорката Митева, како што е познато, уште на 22 февруари 2008 година беше осудена за злоупотреба на службената положба, односно за набавка на административно-деловен простор за потребите на УЈП. Според обвинението, Митева во непосредна спогодба склучила договор со Љупчо Палевски, соинвеститор и продавач на дел од станбено-деловниот објект „Тифани“ за простор со површина од 640 квадратни метри. За просторот било договорено 35 милиони денари да се обезбедат од државниот буџет, а преостанатите 25 милиони денари преку буџетската проекција на УЈП за следната календарска година. Во договорот со Палевски бил одреден и рок за заверка на договорот и предавање на недвижниот имот во сопственост најдоцна до 31 декември 2005 година, а клуч на рака требало да биде дад��н до крајот на март 2006 година. На 22 декември Митева потпишала налог-барање за плаќање, со кој од трезорската сметка на УЈП биле префрлени 35 милиони денари, на сметка на Комерцијална банка.

Со првостепената пресудата ексдиректорката на УЈП беше обврзана, во рок од три месеци, во државниот буџет да уплати 35 милиони денари, односно износот за кој била оштетена државата.

Само неколку месеци подоцна, односно во јули 2008 година, предметот на Митева, по жалба, заврши во Апелациониот суд. Повисокиот суд ја потврди пресудата, а по барање за вонредно преиспитување на одлуката, од април минатата година предметот заврши во Врховниот суд на на Македонија.

„Утрински весник“ веќе пишуваше дека Кривичниот совет што одлучувал по овој предмет тогаш ги укинал двете пресуди и го вратил предметот на повторно одлучување. Но, по направеното пререферирање на предметот, укинат е само делот што се однесува на второстепената пресуда и предметот е вратен на повторно одлучување во скопскиот Апелационен суд. На 18 март, жалбата на обвинетата била одбиена, а пресудата станала правосилна.

Инаку, Митева беше и дел од големата група обвинети во случајот на Бајруш Сејдији, но таа беше изземена од таа судска постапка и, најверојатно, ќе се појави во вториот предмет што се води против споменатиот, а што се' уште е во фаза на истрага.