Силно невреме ги уништи насадите со тутун во Десово
Жителите на селото не паметат вакво невреме, кое само за 15 минути остави пустош зад себе
Прилеп - Силно невреме проследено со град со големи на лешник и силен ветар што го зафати атарт на долненското село Десово завчеравечер ги оштети, на места 70 отсто, а на места и до 100 отсто насадите со тутун, пченка и мал дел со градинарски култури. Жителите ги проценуваат штетите на приближно два милиона евра.
„Беше страшно, среќа невремето траеше само 15-тина минути. Силен ветар удираше од сите страни, оштетени се куќите, покривите, а и родот ни остана по нивите. Насадив 12 декари со верба дека ќе добијам квалитетен род и дека ќе ја поминам зимата што доаѓа, но сега сум целосно без пари, без денар“, вели Мујо Фазлиќ, проценувајќи ги личните штети на приближно пет илјади евра.
Неговиот соселанец Љатиф Вејселоски се жали: „Штетите се околу 13 илјади евра, ништо не остана од тутунот што го насадив на 36 декари. Како сега натаму ќе го прехранам моето седумчлено семејство, не знам. Никој не е вработен, а сите сме возрасни луѓе. Цела година сме по нивните и сега ете пак останавме без пари, само со работата“, вели Вејселоски, кој е и претседател на месната заедница.
„Бараме итна помош и од Владата и од ресорното министерство. Никој не го посакува лошото, но кога ќе дојде нема каде да се оди, затоа бараме помош, да излеземе и ние од оваа елементарна непогода. Вакво невреме не се памети, како торнадо, дојде уништи се' за 15 минути и замина“, вели Сашо Паноски, секретарот на месната заедница.
Жителите очекуваат дека локалната самоуправа бргу ќе формира комисија за процена на штетите и ќе се заложи да им помогне. (Мн.Т.)
|
