Доколку изгубите личен документ, веќе нема да биде потребно двапати да одите во „Службен весник“ - еднаш да го пријавите изгубениот документ, а другиот пат за да обезбедите потврда дека е објавен огласот. Сега е потребно да се оди само еднаш, по што МВР ќе биде формално известено и граѓаните ќе можат да аплицираат за нов личен документ. Ова се придобивките од Меморандумот за соработка меѓу МВР и ЈП „Службен весник на РМ“, кој вчера го потпишаа министерката Гордана Јанкулоска и директорот Тони Трајанов. Имплементацијата на договорот се очекува да почне во март следната година.
„Значи, сега вториот дел од постапката ќе се одвива меѓу МВР и ‘Службен весник‘, а граѓанинот ќе треба само да се јави на шалтерите од управните служби, надлежни според местото на живеење во МВР за вадење нов документ“, изјави Јанкулоска. Трајанов рече дека просечно во текот на годината се согласуваат 30.000 неважечки документи, при што повеќе од половината се лични карти. (Г.А.)
