...И уште нешто

Образование

Градоначалникот на Неготино. Пане Трајков, им врачи свидетелства на 30 Роми од неготинското село Криволак, на возраст од над 16 години, за завршено основно образование во рамките на проектот за дооформување на образованието. Наставата ја спроведе Работничкиот универзитет, со поддршка на Црвениот крст.

Берово и сметот

Општина Берово издвои од својот буџет 1.700.000 денари за набавка на специјално возило за собирање смет. Со набавката на новото специјално возило (компактор) и со обновата на возниот парк во Јавното претпријатие за комунални работи „Услуга“, се создадени подобри услови за одржување на комуналната хигиена во градот.

Мотоциклисти

Мотоклубот „Струга“ на 5 и 6 август на летната сцена при Домот на културата „Браќа Миладиновци“ ја организира петтата мотозабава на која ќе настапат голем број мотоциклисти од Македонија и од странство. Орга��изаторите најавуваат дека ќе има учесници-вљубеници во моторите и од Германија, Австрија, Франција, Норвешка и од многу други држави.

Информатика

Министерството за информатичко општество и администрација почна процес за воведување ИСО 9001 стандардот преку кој најавува зголемување на задоволството на корисниците на услугите и на вработените. „Ги поттикнуваме и сите државни и јавни институции да воведат такви стандарди“, рече министерот Иво Ивановски.

Колекторски систем

Струга очекува наскоро да добие одговор за нивната апликација за проектот за изградба на колекторскиот систем од струшкото село Радожда до туристичката населба Елен Камен.

За изградба на колектор на овој потег од ривиерата, информираат од локалната самоуправа, се потребни речиси половина милион евра.