Досега издадени 1,6 милиони биометриски документи

Заклучно со 1 април, Министерството за внатрешни работи има издадено повеќе од милион и 610 илјади биометриски документи, што, секако, е добра бројка, но очигледно е дека тоа во целост не одговори на барањата на граѓаните, изјави министерката за внатрешни работи,Гордана Јанкуловска, во неделното интервју за Радио Слободна Европа.

„Со оглед на тоа што станува збор за висока и современа технологија, која не секогаш може да ги прифати новите барања што не биле дел од дизајнот на системот во 2005 година, се соочуваме со тесно грло во процесинг-центарот, односно неможност да ги издадеме сите документи за кои граѓаните веќе аплицирале. Тука направивме чекор напред со тоа што потпишавме договор со фирмата, која, практично, обезбедува гаранција за системот, за обезбедување на една дополнителна машина за персонализација и очекуваме некаде пред летните одмори таа да дојде за да се зголеми капацитетот, кој моментално изнесува само пет илјади документи во текот на еден ден. Со тоа, вели Јанкуловска, веруваме дека оние рокови што се закажани за идната година ќе може да ги поместиме понапред.

Инаку, додава таа, со инвестицијата што е направена, односно договорена во 2005 година, Република Македонија се одлучила за еден ваков систем со ваков капацитет. Но, факт е дека тоа е техничко решение што моментално функционира со одредени проблеми и ние, грубо речено, сме врзани со ова решение, бидејќи договорот со фирмата што го сервисира трае до 2017 година.

Во врска со зачестената појава на оружени престрелки и во центарот на Скопје, министерката вели: „Еден чекор, кој се' уште е во фаза на дообработка, размислување и ќе биде предмет на разгледување најпрвин во Владата, а потоа доколку Владата се согласи со ваков чекор, и во Собранието на РМ, е повторно спроведување одредени активности што би значеле собирање на нелегалното оружје во оптек.“

„Статистиките говорат дека најголемиот дел од овие престрелки се токму оние во кои е употребено оружје што се поседува без дозвола“, рече министерката за внатрешни работи, Гордана Јанкуловска, во неделното интервју за Радио Слободна Европа. (Д.Р.)