Кривични пријави за 34 цариници
Царинската управа поднесе кривични пријави против 34 царински службеници поради сомневање дека повеќепати ја злоупотребиле службената положба. Според Царината, пријавените се осомничени дека во периодот од јануари 2005 до јули 2007 година, додека работеле како виши цариници, водачи на смена и цариници во царинската експозитура Ќафасан, им овозможиле на возачи на камиони да го оштетат државниот буџет и сметката на ЈП „Македонија пат“ за околу 8,5 милиони денари.
„Пријавените цариници одлучиле 1.326 камиони со носивост над дозволената тежина од 40.000 килограми по кантарни белешки да остварат влез во царинското подрачје на РМ, без притоа да обезбедат дозволи од ЈП ‘Македонија пат‘ за вонреден превоз или без да извршат претовар“, соопштуваат од Царината.
Раководителите на смена давале одобрение за предметните возила да бидат изготвени транзитни документи, а цариниците ги потврдувале. (Г.А.) |
