Поглед

Посна трпеза

АлександриЈа Стевковска

Минимална храна за оптимално здравје, советуваат нутриционистите. Дали овој совет може да се примени во практиката во македонското секојдневје, каде што статистичарите пресметале дека навистина се храниме минимално, но евтино и неквалитет��о, што би значело дека со официјалната потрошувачка кошница далеку сме од оптимално здравје. Бидејќи кој може да биде здрав ако во неговото семејство од четири члена, месечно се јаде само 1,2 килограма риба, 1,3 килограма месо, 600 грама пилешки стек. За да не биде премногу строга методологијата за пресметка на месечните потреби за храна на едно семејство, замислете, дозволено е да се испие дури 13 литри млеко во тие 30 дена, 3,6 литри јогурт и да изеде 2,5 килограми кисело млеко. Целата листа на кошницата содржи можеби разновидни најосновни продукти, но во бизарни количини, кои никако не можат да го нахранат семејството, па треба да се биде вистински волшебник за да се преживее месецот, онака како што тоа го измоделирале статистичарите. Тие, пак, се потрудиле да се збогатат менито, со тоа што на сметка на поскапите артикли што се дел од листата, кои се бројат во грамови, се ставени поголеми количини од евтините артикли, како да секој ден во месецот ќе се јаде компир, грав, ориз, колку за да се залаже гладот.

Потрошувачите одамна реагираат дека Статистика сосема ги промашува пресметките за тоа што тие трошат за храна и за пијалаци, иако и луѓето кои ги прават листите на производи и сами се свесни дека е невозможно на терен месечните трошоци да бидат како оние на хартија. Секојдневјето ја демантира статистиката и докажува дека издатоците за потрошувачката кошница се многу поголеми и тоа, ако не повеќе, барем тежат колку просекот на една македонска плата, која се движи околу 20.000 денари.