Американското имиграциско биро (БИА) по вторпат издаде наредба за депортирање на македонски Албанец, кој тврди дека во Македонија бил прогонуван и затворан. Американските власти сметаат дека тврдењата на Шкелгим Дука не се веродостојни, па ја одбија неговата жалба, објавија вчера весниците во САД.

Македонскиот државјанин бараше ревизија на првичната пресуда на Имиграциското биро во 2008 година, со која му беше изречена депортација од САД и враќање во Македонија. Дука тврди дека условите за живот во Македонија биле исклучително тешки, жалејќи се дека особено биле загрозени човековите права. Тој тврдел дека доколку се врати во Македонија, неговиот живот ќе бил доведен во опасност, бидејќи во земјава претходно бил притворан и тепан. „БИА детално го разгледа извештајот на американскиот Стејт департмент од 2007 година за почитувањето на човековите права во Македонија и утврди дека извештајот укажува, оти иако дискриминацијата кон етничките малцинства продолжува, севкупните етнички тензии се опаднати, а македонската Влада презела чекори за подобрување на правата за малцинствата“, пишуваат американските медиуми. Бирото не виде ниту докази дека Дука дека во Македонија бил прогонуван, поради што тој ќе биде депортиран од САД, објавуваат тамошните медиуми. (Г.А.)