Пресудата за Методи Смиленски укината, но останува во притвор

Смиленски останува зад решетки поради австриското државјанство и опасноста да ја напушти земјава

Љубиша Станковиќ



Врховниот суд ја укина пресудата и за бизнисменот Методи Смиленски, поранешен сопственик на пропаднатата Експорт-импорт банка, но тој останува зад решетки поради австриското државјанство и опасноста да ја напушти земјава. Највисоката судска инстанција заседаваше завчера до доцна во ноќта и одлучи да ги поништи пресудите за кои ексгувернерот на НБМ Љубе Трпески и банкарот Методи Смиленски беа осудени на 4,5 години затвор. Тие, исто така, беа обврзани да враќаат штета од 22 милиона долари. Согласно со одлуката на Врховниот суд, предметот се враќа на повторно судење, со што двајцата добиваат втора шанса за докажување на нивната невиност во аферата со откуп на државен долг. По одлуката за укинување на пресудите, Трпески по еден месец поминат во „Идризово“ завчеравечер беше пуштен на слобода, од каде што ќе го следи новиот судски процес.

Кривичниот совет ја донесе одлуката за Смиленски во четвртокот во доцните вечерни часови. На средбата е констатирано дека тој освен македонското, поседува и австриско државјанство, што претпоставува дека може да ја напушти државава и да го избегне судењето, кое ќе треба да се повтори. Како што дознаваме, Смиленски од затворот „Идризово“ е префрлен во Истражниот затвор „Скопје“.

Трпески и Смиленски беа осудени на 4,5 години затвор поради откуп на државниот долг, што во име на државата требало да го реализира фирмата -агент „Симак холдинг“ во сопственост на бизнисменот Смиленски. Од почетокот приказната имаше тежина, бидејќи во својство на сведоци се јавија еден поранешен премиер и тројца министри за финансии, меѓу кои и сегашниот премиер Никола Груевски.

Стратегијата на одбраната беше насочена во правец на докажување дека државата не само што не претрпела штета, туку дека била направена заштеда од 17,3 милиони долари.

„Владата со која претседавав успеа да врати долг од 100 милиони за четири години. За конкретниов случај добивме извештај од НБМ што се однесуваше на откупот на долгот и се констатираше дека работата е успешно завршена“, рече експремиерот Љупчо Георгиевски, со што јасно застана зад целата работа, за која Трпески одговараше за сторена злоупотреба на службената положба, а Смиленски за поттикнување злоупотреба.

Судскиот совет, кој им пресуди на Трпески и на Смиленски, е истиот оној што им судеше на поранешниот вицепремиер Васил Тупурковски и на Јован Андонов. Но, со укинувањето на пресудата, која неколку месеци подоцна стана и правосилна, судството се доведе во многу чудна ситуација.

Одделот за санкции кон крајот на ноември минатата година, не чекајќи ја одлуката на Врховниот суд, донесе одлука Љубе Трпески да замине на издржување на затворската казна. Од судот тогаш се тврдеше дека Трпески избегнувал да прими упатен акт за издржување на затворската казна и дека судот петпати вложувал напори да му го врачи актот на обвинетиот. Трпески беше приведен од страна на полицијата на 16 декември 2009 година и оттогаш се наоѓаше во затворот „Идризово“.

Безмалку идентични се работите што се врзуваат и со Методи Смиленски. Тој најпрво беше екстрадиран од Србија, а по барање на судот во Свети Николе. На првото судење Смиленски за случајот „Картонтекс“ беше осуден на една, а за случајот „Снитекс“ на 3,5 години затвор. Подоцна овие пресуди беа укинати и тој беше ослободен од обвинение.

Во изминативе неколку месеци Врховниот суд укина уште неколку судски пресуди, а се чека на уште неколку негови одлуки. Од поинтересните судски случаи што беа укинати од Врховниот суд се издвојува предметот што се однесува на армиското оружје и за двојното убиство во Влае што беше третирано како крвна одмазда. Се' уште не е донесена одлука за предметите „Бачило 1“ и „Бачило 2“, за поранешната директорка на УЈП, Петра Митева и за уште неколку други судски предмети.