МВР нема да фабрикува докази за никого

 „МВР стои во целост зад вистинитоста на одговорот што го доставивме  до Драган Павловиќ - Латас, уредник на телевизијата Сител и на дневниот весник ’Вечер‘. Нема да заземаме страна, да лажеме и да фабрикуваме докази за ничиј интерес“. Ова е реакцијата на министерката за внатрешни работи, Гордана Јанкулоска, со врска со документот кој експресно му беше издаден на новинарот по информациите објавени во весникот „Време“ дека тој соработувал со српските разузнавачки служби.

Министерката тврди дека МВР не издава потврди дали некој е шпион или не, а оцената дали некој е соработник со служби на безбедност ја дава Комисијата за лустрација.

„Време“ објави документи од УБК, според кои Драган Павловиќ - Латас бил соработник на српската разузнавачка служба и бил вмешан во организација на протестите во кои беше запалена американската амбасада во Скопје во март 1999 година.

Од МВР не даваат конкретен одговор дали документот е веродостоен и дали ќе се испитува како воопшто „протекол“ од фиоките на тајните служби во јавноста.

Дали се работи за класична клевета или монтажа, според Јанкулоска, ќе докаже судот. (Х.Р.)