Груевски му закажа на Црвенковски: „Ќе се видиме во пролет 2012“

Ако премиерот остане на ветувањето дека ќе нема предвремени избори, тогаш до следното гласање има најмалку 15 месеци

Александра М. Митевска

Од почетокот на март до крајот на мај 2012... На некој датум од овој период би требало да се одржат следните парламентарни избори, според математиките на премиерот Никола Груевски. Во обраќањето пред Унијата на жени на ВМРО-ДПМНЕ, тој му закажа изборен двобој во редовниот термин на својот главен ривал - лидерот на СДСМ, Бранко Црвенковски, кој, пак, се' повеќе ја интензивира битката за вонредни избори.

„Замислете, симболот на мрачната транзиција пред неколку недели, во „името на народот“, порача дека ми дал шанса. Со неговите седум проценти доверба и со неговото минато. Со задоволство ќе ја искористам шансата на наредните редовни избори да му помогнам на СДСМ да се ослободи од баластот на минатото на Бранко и на неговата дружина и, конечно, да почнат реформите во оваа партија“. Ова го истакна Груевски во долгометражното обраќање, во кое главен антихерој беше токму водачот на опозицијата. Иако го оквалификува како најпосакуван противник, кого поради „минатиот труд“ би можело лесно да го совлада, премиерот вложи многу енергија и не штедеше зборови, фрази и поговорки за да им го долови на сопартијките политичкиот профил на Црвенковски.

Од СДСМ вратија дека Груевски покажува храброст само пред жените од сопствената партија и повторно го повикаа веднаш да излезе на избори, доколку верува во тоа што го говори. „Бадијала ви се 63 пратеници кога го изневеривте и го излажавте сопствениот народ. Вие и' го прокоцкавте легитимитетот на

ВМРО-ДПМНЕ да се преставува како народна партија. Сега единствено од народот зависи кога ќе има избори. Со ваквите ваши постапки само го зголемувате неговиот гнев“, изјави секретарот на СДСМ, Андреј Петров. Според него, Груевски уште еднаш покажал дека нарачаните и лажни анкети му служат само за храбрење на партиското членство.

Инаку, Институтот за политички истражувања вчера пласираше анкета што била спроведена од 10 до 14 декември и со која биле опфатени 1.100 испитаници. Според резултатите, кога утре би се одржале избори за ВМРО-ДПМНЕ, би гласале 23,3 проценти од испитаниците, а за СДСМ 11,4 отсто. ДУИ има поддршка од 6,9 отсто, ДПА - 2,6, а Нова демократија - 1,8. Други партии немаат доверба поголема од еден процент. За Груевски позитивно се изјасниле 45,9 проценти од испитаниците, а 46,8 имале негативен став, додека за Црвенковски позитивно мислење имале 29,1, а негативно 61,5 проценти од анкетираните граѓани. Изненадување во оваа анкета е позитивниот став на граѓаните кон претседателот Ѓорге Иванов, кој ако се суди според прикажаните проценти, речиси е исто популарен колку и Груевски. За шефот на државата позитивна оценка дале 45,7 проценти, а негативна 44,8 !?

Според Уставот, избори за пратеници се одржуваат во последните 90 дена од мандатот на стариот пратенички состав или во рок од 60 дена од денот на распуштање на Собранието. Според тоа, имајќи предвид дека последните (предвремени) парламентарни избори се одржаа на 1 јуни 2008 година, следното изборно соочување во регуларен термин би се случило во пролет 2012 година - во периодот март- јуни. Секако, ако целосно се отфрли можноста за (вонредно) распуштање на парламентот - поради ставот на ВМРО-ДПМНЕ против опозициската иницијатива за предвремени избори.

Сепак, до регуларниот изборен термин има околу 15 месеци, што е доволно долг период за Груевски во меѓувреме да се премисли или, пак, околностите да го принудат за предвремени избори. Неговите коалициски партнери од ДУИ овој пат навистина од почеток беа против иницијативата за вонредни избори, но прашање е дали и во наредната година ќе трае идилата меѓу сојузниците во Владата?

Но, и дали помалите коалициски партнери до крај ќе му останат верни на премиерот и ќе му помагаат да го одржи апсолутното мнозинство во парламентот до пролет 2012? И покрај тоа што анкетите покажуваат убедлива предност на владеја��ките партии, факт е дека процентите за ВМРО-ДПМНЕ и за ДУИ веќе не се високи колку што беа пролетта 2008 година. А, како што рејтинзите на власта постепено, ама, се чини, сигурно одат надолу, така и се засилува опозицискиот притисок врз неа. (A.M.M.)