Реторика на ниско ниво, а со висок напон

На политичката сцена, и без избори, станува се' пожешко и пожестоко

„Ќе јадеме живи луѓе“! „Нека не се грижи дека некој ќе му направи атентат. Не дај боже! Пу, пу, пу!“ „Ако случајно слушнете или забележите дека некој сака нешто лошо да стори за своето здравје и животот, ве молам да му укажете помош!“ „На власт ќе влеземе тимски - од хигиеничар до министер“. Ова се дел од „бисерите“ што имаа можност граѓаните да ги слушнат во текот на викендот и кои уште еднаш докажаа дека на политичката сцена, и без избори, станува се' пожешко, така што се вжештуваат и реториката на политичарите.

Аналитичари посочуваат дека треба да се има предвид оти политичарите настапуваат поостро кога се обраќаат пред своите сопартијци. Нивните говори повеќе се во функција на подигнување на моралот на членството во матичните партии отколку што би можело да влијаат на кредибилитетот на противничкиот табор.

Во саботата духовите ги разбранува потпретседателот на СДСМ, Зоран Заев, откако Македонското радио објави делови од неговото обраќање пред сопартијците во Валандово. Таму Заев порачува дека кога социјалдемократите ќе се вратат на власт, ќе јадат живи луѓе и ќе ги избркаат од работа административците вработени во времето на ВМРО-ДПМНЕ, по што ќе се отворат нови работни места за „наши луѓе“.

Заев тврди дека секвенциите од неговиот настап биле извадени од контекст. „Со бришењето и непуштањето на речениците од мојот настап пред објавените секвенции и по нив, изрежирано и измонтирано е сценариото кое исклучиво има цел да се создаде лоша слика за мене и за мојата партија“, наведува Заев во демантот, во кој стои и дека пред или по тие секвенции одат негови зборови со кои повикуваат на заедништво.

Но, неговиот демант не ги спречи членовите на извесната граѓанска иницијатива „Правда за сите“ вчера да излезат пред Спомен-куќата на Мајка Тереза во Скопје и да ги критикуваат, како што велат, скандалозните изјави на струмичкиот градоначалник. „Тоа се изјави на гневен човек, човек кој не им мисли добро на граѓаните. Да кажете дека живи луѓе ќе јадете е доказ дека умот е далеку“, рекоа од „Правда за сите“.

Реагира и раководството на Сојузот на синдикатите, кое го осуди настапот на Заев. „Нашиот став е да се отвораат нови работни места, а никако бркање на едни за да ги заменат други“, велат од ССМ.

Премиерот Никола Груевски, пак, во петокот вечерта во Универзална сала се обиде да биде полуциден, освежувајќи ја својата најчесто стерилна и фактографска реторика со народни мудрости, фрази и шеги на сметка на Бранко Црвенковски. Тој ги повика сопартијците да го чуваат Црвенковски и да се грижат да не му се случи нешто, зашто тешко ќе најделе друг таков противник. Во говорот пред жените од ВМРО-ДПМНЕ, Груевски во неколку наврати цитираше и мисли од поранешната премиерка на Велика Бртитанија, Маргарет Тачер, но, во овој случај, не за да го компромитира Црвенковски, туку за да ја потенцира улогата на жената во политиката. (А.М.М.)