Истекува ултиматумот за Али Ахмети

Денеска во 12,30 часот истекува рокот што му го даде новоформираната партија Албански сојуз на Али Ахмети да се повлече од политичката сцена во Македонија. Ако не го стори тоа, тогаш ќе бидат објавени оригинални документи, што ја докажувале, наводно, врската на ДУИ со тајните служби.

Албанскиот сојуз му постави ултиматум на Ахмети: или ќе го снема од политиката или јавноста ќе ги имала на увид оригиналите од документите што беа доставувани во изминатите месеци до Комисијата за лустрација, која ги прогласуваше за фотокопии, што не се релевантни за натамошна истрага.

Ваљон Беља од Албанскиот сојуз тврди дека документите биле оставени во поголема кутија пред вратата од неговиот дом во скопската населба Топанско Поле. Претходно, во јавноста беа пласирани досиеја за челници на ДУИ, за кои луѓето што ги носеа во Комисијата за лустрација тврдеа дека ги нашле во двор или биле оставени врз автомобил.

„Документите ги заверивме кај нотар, а тоа е можно само ако се оригинали“, изјави вчера Беља. Тој вели дека ако Ахмети не се повлече, прво ќе ги објави документите „пред целото општество“, а потоа ќе можеби ќе ги однесе до Комисијата за лустрација. „Само еден е оригиналот и ако остане во Комисијата, потоа нема да важат фотокопиите“, додаде Беља.

Од ДУИ, пак, се убедени дека ултиматумот на Беља е масло на ДПА, како дел од дива албанска кампања, во период кога постоеле обиди за валкање и на ОВК во Косово. Документите што беа доставувани досега до Комисијата за лустрација од трети лица резултираа само со една кривична пријава - за поранешниот началник во УБК, Хисен Муслиу, кој е обвинет за фалсификување документи. (А.М.М.)