Долго чекање овластување
Драги Мечкаров, Скопје
Спроведување на дополнувањата од Законот за градба, односно за издавање овластувања за лица за проектирање, надзор и ревизија е поврзано со понатамошно издавање лиценци за работа на фирмите од областа на проектирањето, надзорот, ревизијата и изведувањето работи на објекти. Издавањето на овластувањата треба да се прави од страна на Комората за овластени архитекти и овластени инженери и тоа согласно со Правилникот што е објавен во „Службен весник на РМ“ кон крајот на октомври. Бидејќи јас и мои колеги од други области (машинство и градежништво) комплетната документација ја поднесовме на 5.11.2008 година, до денес (4.12.2008 г.) немаме добиено никаков конкретен одговор. Поточно, и покрај неколку пати остварените телефонски разговори и два пати писмени барања, до денес немам добиено дефинитивен одговор кога ќе ги добијам потребните овластувања. Да напоменам дека согласно со Правилникот, доколку комисијата нема забелешки во однос на доставената документација, таа е должна да ги издаде овластување во рок од седум дена.
|
