Посвојување само со врски
Mариче Стојанова, Велес
Јас и мојот сопруг имаме по 35 години и веќе пет години чекаме на посвојување во нашиот град Велес. Бидејќи немаме врски, не ни вреди тоа што сме добро ситуирани, паметни, почитувани граѓани и добри деца на своите родители кои, рака на срце, веќе полека но сигурно се помируваат со таа ситуација. Молам за совет: што да прават интелектуалците со своето високо образование, зашто изгледа само со честа и својот образ не можеме да дојдеме до дете. Социјалните работнички само ни се насмевнуваат, ни велат дека ние сме во план, но деца - немало!?
Колку треба да се чека да се дојде до тоа дете, кое со години е сонувано од нашите изморени срца!? Немаме сили да одиме веќе по клиники, со тие пари досега ќе изгледавме барем две усти. Дали Македонија навистина се грижи за своите граѓани? За скандалот да биде уште поголем, кога најпрво ги поднесовме документите, тие беа заборавени во фиока речиси две години. По наше долго инсистирање, едвај започна постапката за конечно да добиеме писмо од Скопје со кое не' известуваат оти сме посвоители и официјално, односно само ставени на листа за чекање. Тоа чекање трае пет години. Зошто се' уште не сме добиле дете, верувајте, не знаеме! Останавме само со надеж дека и ние ќе станеме родители, ама во нашата Македонија ништо изгледа не може да помине без врски. До кога и до каде ќе се оди со тие врски? |
