ВЕЛЕС - Тупаници и клоци по целото тело изминатава година често пати добивала дваесет и седумгодишната В.Ѓ. од сопругот. Случајот доживеал кулминација пред една недела, кога сопругот Г.Ѓ. ја нападнал жена си пред целата фамилија додека се подготвувале за семејна прослава. Откако жената го пријавија случајот во полиција, велешанецот е приведен и му е одреден осумдневен притвор.

Според досегашните сознанија, сопругот најчесто под дејство на алкохол физички ја малтретирал жена си, зашто во бракот не влегла невина, а тоа претходно му било ветено од стројникот кој ги запознал. Тој ја навредувал и и' се обраќал со секакви погрдни зборови, а расправиите го достигнувале врвот со физички напади. Раскараните сопружници биле во брак една и пол година и имаат десетмесечно бебе. Сопругата неколку пати досега пријавувала во полиција и во Центарот за социјални грижи за насилството, по што повторно се враќала во семејната куќа за да го зачува бракот. (С.Ќ.Н.)