Признание

Нови медали за филателистите од Македонија

Веќе стана традиција македонските филателисти да се враќаат од големите светски изложби со медали за своите интересни и богати колекции. По успехот на светската изложба во Лисабон во Португалија, каде што освоија пет медали, три сребрени и две бронзени, уште поголем успех постигнаа минатата недела во Бугарија, на изложбата во Пловдив „Балкан фила 2010“, освојувајќи шест медали, што е уште еден доказ дека располагаат со извонредни колекции на марки со разна тематика. Како што не' извести претседателот на Сојузот на филателистите на Македонија, Стеван Славевски, најсветло одликување добил Климе Поповски, златно-сребрен медал за колекцијата „Св. Кирил и Методиј - словенски учители и патрони на Европа“.

Со сребрени медали се наградени: Дончо Георгиев (Охрид - град на УНЕСКО) и Синиша Павлески (колекција на петли и хокеј на мраз), додека Димитар Свирков (Мајка Тереза) и Лилјана Антоновска (коњи) од Пловдив се вратија наградени со бронзени медали.

На годинашниве светски изложби во Белгија, Париз, Лисабон и во Пловдив, македонските филателисти освоија вкупно 14 медали. (М.М.)