Украинските автобуси го фатија последниот воз за Скопје

Пет од вкупно 15 автобуси вчера попладне ја минале унгарско-српската граница, денеска се очекува да стасаат во Скопје

Украинските автобуси го фатија последниот воз и се очекува денеска, конечно, да бидат во Скопје откако вчера напладне ја минале унгарско-српската граница.

Неофицијално, пет од 15 автобуси на „Лаз“ како дел од првата пратка од владината набавка на 84 обични автобуси вчера транзитирале низ Србија на пат кон Скопје. Останатите девет автобуси, веројатно, денеска ќе тргнат од Украина, додека еден автобус веќе е кај нас од пред Нова година како примерок на кој се вршеа неопходните тестирања како дел од процесот на хомологација. Така, целата пратка се очекува да се комплетира во текот на викендов. Со тоа, практично, од „Лаз“ во последен момент ќе го испочитуваат рокот за испорака, кој истекува на крајот на јануари. Веќе за дваесетина дена возилата треба да се вклучат во јавниот превоз.

Од ЈСП вчера потврдија дека автобусите се тргнати кон Скопје и оти денеска, веројатно, ќе ги чекаат на царинскиот терминал. Според процените на надлежните, во 15 нови „обични“ автобуси, граѓаните ќе можат да се возат веќе кон средината на февруари откако ќе ја добијат и конечната виза од Машинскиот факултет. Привилегија да се возат во нив ќе имаат корисниците на ЈСП на линиите „3“, „5“ и „15“, но и на другите линии, оти како што планираат од ЈСП, новите автобуси во прво време ќе ротираат на повеќе линии.

Инаку, целата владина набавка, тешка 11 милиони евра, треба да се реализира до крајот на годинава. (Дс.Т.)