„Бетон“ ќе гради летниковец на плоштад за 350.000 евра

И летниковецот на плоштад ќе го гради „Бетон“, градежната фирма кој се јавува како изведувач на поголемиот дел градби од „Скопје 2014“. За изградба на ова здание, Општина Центар ќе плати речиси 350.000 евра. Летниковецот, чија изградба во писменото образложение на „Скопје 2014“ е оправдана како потреба од украсен елемент на плоштадот, ќе се работи по идејно решение на фирмата „Мегарон“. Кружниот објект ќе се наоѓа во непосредна близина на поранешниот Офицерскиот дом и хотелот, дел од комплексот Градска куќа.

На парцелата од неодамна веќе се завршени подготвителните работи за организација на градилиштето. Од Општина Центар вчера информираа дека екипи на „Бетон“ наскоро ќе излезат на терен и ќе почнат со изградбата.

„Планирано е летниковецот комплетно да биде готов до средината на оваа година. Тој ќе биде изработен од армирано бетонска конструкција што ќе се обложи со мермер“, дополнија вчера од Центар. (Дс.Т.)