По две децении затвор за претседателскиот пар на Тајван

Додека бил во претседателскиот кабинет Чен Шуи Бијан незаконски зел 20 млн. долари

ТАЈПЕЈ - Тајванскиот Врховен суд им изрече казна на поранешниот претседател Чен Шуи Бијан, антикинески поттикнувач чија реторика го налути Пекинг и го иритираше Вашингтон, и на неговата сопруга во времетраење од 19 години затвор по обвиненијата за корупција, изјави вчера официјален претставник на судот. Одлуката, која не може да биде обжалена, им стави крај на два случаи од мноштвото против поранешното прво семејство, што значи дека пресудата би можела да биде зголемена откако Врховниот суд ќе ги разгледа и другите обвиненија. Врховниот суд во јуни им изрече на Чен и на неговата сопруга 20-годишна затворска казна.

Судбината на Чен може да има влијание врз напнатите локални избори што ќе се одржат на 27 ноември, бидејќи тој беше единствен претседател во историјата на Тајван на антикинеска опозициска партија и се сметаше како носител на стандардот на партијата додека не поднесе оставка по обвиненијата што беа поднесени против него. Изборите што ќе се одржат во ноември се сметаат за предвесник на претседателската трка во 2012 година.

Чен, кој е во затвор веќе две години и ќе стане прв поранешен претседател што одлежал затворска казна, ги отфрла обвиненијата и посочува дека се политички мотивирани. Додека ја извршуваше функцијата претседател од 2000 до 2008 година тој се залагаше за официјална независност од Кина, која има претензии врз островот и бара обединување по шестдецениска одделна власт. Неговиот став ги вознемири Пекинг и САД, најверниот сојузник на Тајван, додека се обидуваше да изгради односи со Кина.

Чен и поранешната прва дама Ву Шу Јен, исто така, се соочуваат и со обвиненија за перење пари и злоупотреба на државните фондови. Случаите вклучуваат вкупно 20 милиона долари за кои Обвинителството наведува дека биле незаконски земени додека Чен бил во претседателскиот кабинет. (Ројтерс)