Претходен број

Хелсиншки предупредува на можни изборни инциденти

Хелсиншки комитет не ја исклучува можноста дека на претстојните избори се можни инциденти, што го посочува во февруарскиот извештај за состојбата со човековите права во државава. Комитетот ги анализира случувањата во земјава во контекст на изборите, наведувајќи го извештајот на набљудувачката мисија на ОДИХР: „Во него се говори за предвремен почеток на кампањата, за пријавени случаи на заплашување, особено во јавната администрација, а се констатира и дека Државната изборна комисија е недоекипирана, како и дека општинските изборни органи не го довршиле тренингот“. Комитетот посочува и на констатацијата на ДИК дека изборите ќе бидат најсложени досега и заклучува: „Во еден ваков амбиент не се неможни инцидентите веќе видени на минатогодишните предвремени парламентарни избори“. Понатаму во извештајот Комитетот предупредува на заканата на жителите на Танушевци, Брест, Малино и Блаце дека ќе ги бојкотираат изборите револтирани, бидејќи на чело на избирачките одбори во селата се поставени Македонци.

Според Комитетот, инциденти не се можни само во средини со албанско мнозинско население, а како пример се посочува Струмица и демолирањето на автомобилот на Мојсеј Трајковски, брат на покојниот претседател Борис. (Д.Р.)