ЕУ испрати заканувачко писмо

Комесарот на ЕУ за внатрешни прашања, Сесилија Малмстром, и испрати писмо на министерката за внатрешни работи Гордана Јанкуловска за да ја извести дека Македонија и Србија би можеле да го загубат правото нивните граѓани да патуваат во ЕУ без виза. Европската комисија, заедно со белгиското претседателство, размислува кон крајот на месецот да организира мисија на високо ниво што ќе ја потврди ситуацијата на теренот.

„Поминаа речиси 10 месеци откако е повлечена визната обврска за влез во земјите од шенгенската зона на ЕУ, за граѓаните на вашата земја“, пишува Малмстром. „Некои земји-членки уште еднаш се соочуваат со алармантен пораст на лицата кои доаѓ��ат од вашата земја и бараат азил. Тој тренд е крајно загрижувачки и може сериозно да го загрози целиот процес на визна либерализација на Западен Балкан“, стои во писмото на Малстром.

Писмото е предупредување дека ситуацијата би можела да доведе до обновување на визниот режим за српските и македонските граѓани, но исто така, дека би можела да ја одложи одлуката на ЕУ за укинување на визниот режим за Босна и Херцеговина и за Албанија, за која одлуката треба да се донесе на 8 и 9 ноември.

„Како што е познато, процесот на мониторинг на визната либерализација е воведен од Комисијата во јануари годинава. Сега се размислува за идно зајакнување на тој процес, што ќе овозможи ЕУ да преземе соодветни мерки доколку има потешкотии“, пишува Малмстром. (Н.Р.)