Филе: Важи препораката на ЕУ за Македонија

Прага – За Македонија и натаму се применува препораката од Европската комисија дека оваа кандидатска земја е подготвена за почнување пристапни преговори со ЕУ. Единствена пречка е името на државата и кога ова прашање ќе се реши преговорите за членство во ЕУ ќе почнат многу брзо, изјави еврокомесарот за проширување, Штефан Филе, во интервју за чешкиот весник „Лидове новини“.

Според него, ЕУ не ги сменила и не ги зајакнала правилата за прием туку од 2006 година бара кандидатите да бидат навистина подготвени за влез.

„Комисијата и земјите-членки сега имаат поголема можност да го надгледуваат квалитетот на процесот за влез во европската заедни��а. Ние, исто така, имаме ново поглавје што се однесува на основните права и слободи на судството кон кое не може да се пристапи механички, туку се проверува дали навистина се создадени законски и технички услови и како тоа функционира. Тоа сега го решаваме со Хрватска“, потенцира европскиот комесар.

За Филе, Хрватска, и покрај одредени компликации, се наоѓа во „последниот круг пред целта“ и доколку успее да исполни одредени услови разговорите за влез во Унијата би можело да се очекува да завршат идната година. Европскиот комесар смета дека и процесот за влез на Исланд во Унијата ќе оди брзо. (МИА)