СДСМ му се налути на спикерот за интервјуто во „Утрински“

Опозицискиот СДСМ му се налути на претседателот на Собранието, Трајко Вељаноски, поради интервјуто дадено за нашиот весник. Оттаму вчера го обвинија Вељаноски го дека „на недозволив и непримерен начин направил груб упад во работата на Анкетната комисија за расчистување на инцидентот од 1 јули“.

„Вељаноски од позиција на претседател, пред да се дочека исходот од работењето на Анкетната комисија, даде квалификација за настанот, ги лоцираше виновниците и ги осуди. Со ваквите скандалозни квалификации, претседателот на Собранието недозволиво грубо ги прекрши основните демократски принципи. Наместо во пресрет на ЕУ-извештајот да се бори за градењето на довербата и враќање на политичкиот дијалог, тој се одлучи за ваков несериозен, типичен вмровски потег со кој се урива сликата за Собранието“, изјави координаторот на пратеничка група на СДСМ, Цветанкла Иванова.

Вељаноски, во интервјуто за „Утрински“, изјави дека не е задоволен од темпото на работа на Анкетната комисија и дека наспроти неговите очекувања, таа работи многу, многу бавно. Тој ги отфрла критките на опозицијата дека дозволил Собранието да стане сервис на МВР, и вели: „Обвинувањата на опозицијата се целосно неосновани. Обезбедувањето на Собранието е уредено со Деловникот, со закони и правилници, и не зависи од мене.

Многу жалам што неколкумина пратеници од опозицијата сосема непотребно испровоцираа инцидент. И наместо самите да се засрамат и да се запршаат зошто го направија тоа, тие во скандалот го вовлекоа парламентот и создадоа негативен имиџ и за Собранието и за државата. Се надевам дека од ова ќе извлечат поука за во иднина да не ни се случуваат вакви инциденти“. (О.В.)