Црвенковски останува во политиката

Лидерот на СДСМ го обвини премиерот Груевски за лажен патриотизам и за манипулации со историјата

Моника Талеска


ПРИЛЕП - „Не се повлекувам од политиката ниту од партијата додека оваа работа што ја започнав со вас целосно не ја завршам. А, тоа значи со вас, секогаш и секаде, до крај, до конечна победа“. Ова им го порача на сите „душегрижници“ лидерот Бранко Црвенковски од завчерашниот митинг на СДСМ, што се одржа на националниот празник 11 Октомври на плоштадот „Методија Андонов-Ченто“ во Прилеп, прв од серијата митинзи за уривање на Владата.

Црвенковски објасни дека во Прилеп не се дојдени за да го партизираат празникот и да го делат народот. „За овие лажни патриоти од власта, периодот од 1945 до 1990 година и заедничкиот живот во рамките на Југославија, е период во кој се' е црно, погрешно и срамно. А, забораваат дека токму во тој период се поставија темелите на современата македонска држава, браните за заштита и развој на македонскиот национален идентитет“, нагласи Црвенковски.

Илјадници граѓани од сите градови на Македонија го демонстрираа своето незадоволство од власта во Прилеп. Дождот што врнеше со часови не беше пречка членовите, симпатизерите, но и многу граѓани што не се политички определени да бидат присутни на народниот собир. Со чадори во едната рака и партиски и државни знамиња во другата, тие скандираа како реакција на критиките што ги упати лидерот на СДСМ на адреса на власта.

Црвенковски го обвини премиерот Груевски за лажен патриотизам и за менување на историјата и манипулации со историјата. „Груевски се срами од вистинската историја на македонскиот народ и затоа измислува нова. Тој не го брани, туку со политички инженеринг го менува нашиот национален идентитет. Затоа е лажен патриот и манипулатор со националните чувства на секој наш човек, на целиот наш народ“, рече лидерот на СДСМ. Притоа ја осуди власта за лоша економска политика, а резултат на тоа е водечкото место на Македонија во Европа според стапката на сиромаштија, невработеност и најниско ниво на странски инвестиции.

„Македонија е земја во која секој трет граѓанин нема леб да јаде и не може да се облече. Но, Македонија е и рекордер според смртноста на новороденчињата и на родилките“, истакна Црвенковски. Критикувајќи ги состојбите во здравството, тој им се извини на сите граѓани што беа дел од спотовите на опозицијата емитувани неодамна, но рече дека не смее да се затворат очите пред реалноста. „Во изминативе недели бевме критикувани за спотовите што ги емитувавме. Ни забележаа дека прикажаните сцени биле страшни, потресни, морбидни. Јас се согласувам со тоа и ја користам оваа прилика да им се извинам на сите луѓе чии судбини беа прикажани. Но, во тие спотови ништо не беше измислено, монтирано, изрежирано. Жално е, страшно е, потресно е, ама тоа е денес реалноста во Македонија. Тоа е судбината на илјадници и илјадници наши семејства“, потенцира Црвенковски.

Тој ја обвини власта дека е креатор на криминал и корупција во државата. Веќе не постои, како што рече, „разграничување што е држава, а што мафија, кои се полицајци, а кои криминалци“. Според него, власта, очигледно, не сака, ниту може да ја внесе државата во НАТО и во ЕУ. Тој им порача на граѓаните дека не ВМРО-ДПМНЕ, туку „бедата, сиромаштијата и бесперспективноста се најголемите непријатели на земјата“. (М.Т.)