Праисториските дами од Македонија на изложба во Норич

Денеска во центарот Сеинзбери за визуелна уметност во Норич, Велика Британија археологот Ирена Колиштркоска - Настева од Музејот на Македонија, ќе говори за музејската изложба „Праистриските дами од Македонија“.

Освен неа, со свои излагања ќе се претстават повеќе еминентни проучувачи на праисториската уметност од различни краишта на светот, во рамките на студискиот ден со кој ќе биде одбележано поставувањето на изложбата „Откопани“ - која во Центарот ќе биде отворена на 22 јуни, а ќе трае до 29 август.

Ќе бидат презентирани женски теракотни фигурини од почетоците на цивилизацијата, поставени наспроти современите претстави на жени.

Автор на концепцијата за изложбата и куратор на истата е Симон Канер од Сеинзбери институтот за проучување на јапонската уметност и култура во Норич.

На изложбата ќ�� бидат презентирани древни фигурини со претстави на жена откриени при археолошки ископувања во Јапонија, Република Македонија, Косово и Романија. Музејот на Македонија учествува со десеттина експонати од своите колекции од периодот на енеолитот и неолитот.

Ирена Колиштркоска - Настева е соработник во реализацијата на изложбата од страна на Музејот на Македонија, а во рамките на презентацијата на современите претстави на жени, ќе биде поставена и скулптурата „Невеста“ на Мери Аницин - Пејоска. (К.Б.)