Нова фасада и за втората сина кула на „Партизанска“

Ова е трета фасада што ќе ја обнови Општина Карпош на своја сметка како дел од акцијата за подновување на зградите

Откако ги освежи фасадите на сината кула и на зградата позната како „Мал одмор“, Општина Карпош се подготвува да го поднови изгледот на втората сина кула лоцирана на булеварот „Партизански одреди“ кај поштата. Планирано е неколкукатницата да се освежи во истата препознатлива боја. Општинарите го завршуваат изборот на фирмата која ќе биде задолжена да го поднови објектот, а деновиве планираат и конечно да ја договорат соработката со станарите од зградата. И во овој случај, Општината ќе ја санира фасадата, а на станарите ќе им понуди можност по повластени услови да извршат замена на прозорците, со цел н��дворешниот изглед на објектот да биде комплетен.

„За да не се доведеме во ситуација како со зградата кај ’Мал одмор‘, неколку станари да ја одбијат соработката, во случајов ќе инсистираме уште пред да се зафатиме со работа сите да се согласат дека ќе ги заменат прозорците. Начелно ја имаме добиено потребната согласност, но, сепак, овој пат тоа ќе го бараме и на хартија. Очекуваме со таа процедура да завршиме до крајот на месецов и веднаш потоа да почнеме со освежување на објектот“, вели градоначалникот Стевчо Јакимовски.

Ова е трета фасада која Општината ја подновува како дел од акцијата за обнова на ликот на впечатливите згради во Карпош. И во овој случај, всушност, станува збор за заеднички проект на Општината и на станарите. Локалната власт комплетно на своја сметка ќе ја изврши санацијата на фасадата, додека на станарите ќе им овозможи да ги сменат прозорците со повластени услови и цени со посредство на НВО „Хабитат“. Инаку, на листата за обнова се и три згради на улицата „Никола Русински“, две на улицата „Јуриј Гагарин“ и други. (Дс.Т.)