Насловна

Нова фабрика за обработка на тутун

КАВАДАРЦИ - Со 80 отсто поголем капацитет за обработка на тутун и официјално во Кавадарци започна со работа новата фабрика на „Алајанс уан Македонија“. Инвестирани се околу четири милиони евра во најсовремена опрема за обработка на тутун. Како што информираа од компанијата, се работи за редок тип партнерство меѓу две успешни компании, едната од странство и другата домашна. „ИГМ трејд“ ја финансираше изградбата на објектот по стандардите на тутунската индустрија и е потпишан долгорочен договор за закуп.

„Денеска сме овде за да им изразиме голема благодарност на луѓето што ја имаа истата визија како и ние и кои веруваа во големиот потенцијал на македонскиот ориентален тутун“, нагласи главниот извршен директор Стергиос Григоријадис.

„Алајанс уан“ во Македонија работи од 1998 година, кога нејзиниот претходник „Дајмон“ влезе на пазарот со купување две домашни компании во Кавадарци и во Виница. Од компанијата рекоа дека прават напори во изминативе две години повторно да го заживеат полуориенталниот тутун од типот „отља“, претежно во Кумановскиот и во Скопскиот регион. ��Алајанс уан“ е на десетто место во земјава на листата извозници.

„Ние инвестиравме во оваа земја бидејќи тука најдовме околина што е пријателски настроена за создавање бизнис и соодветна почва за имплементирање нови идеи и технологии“, рече Хосе Марија Коста, регионален директор за европскиот регион и додаде дека оваа година се склучени договори за повеќе од 6.700 тони македонски ориентален тутун. (А.Д.)