Насловна

Големите прашања

Соња Крамарска

Зошто добивме речиси ист персонален состав на владата по одржаните вонредни парламентарни избори?

По петгодишно владеење на ВМРО-ДПМНЕ станува јасно дека премиерот Никола Груевски не сака да ги менува министрите од своето најблиско опкружување. Зоран Ставрески, Елизабета Канческа-Милевска и Гордана Јанкулоска се очигледно лојалистите од кои тој нема да се откаже. Груевски се оглуши на барањата на јавноста Јанкулоска да даде оставка по тешкиот инцидент со смртта на младиот Мартин Нешкоски или барем таа да биде преместена во друг владин ресор.



Дали Груевски е уценет од коалицискиот партнер Али Ахмети?

Брзото носење закони во парламентот за проширено право за употреба на албанскиот јазик покажа дека коалицијата меѓу ВМРО-ДПМНЕ и ДУИ нема добар почеток. Груевски чекаше парламентот да ги изгласа законите со потписите на главните играчи на ДУИ, па дури потоа го достави предлогот за персоналниот состав на владата. Или, подобро кажано, Ахмети чекаше да биде изгласан новиот закон за да даде зелено светло за владата.



Дали заминувањето на Антонио Милошоски и на Васко Наумовски значи дека владата призна пораз во надворешната политика?

Од владата мистериозно исчезнаа двата истурени играчи Милошоски и Наумовски. Македонија веќе предолго чека пред портите на ЕУ и на НАТО, а причина за тоа е спорот околу името. Иако Груевски книжи поени пред избирачите на сметка на останувањето статус кво во спорот, отстранувањето на Милошоски и на Наумовски е недвосмислен сигнал дека владата си даде негативна оцена по прашањето на евроатлантските интеграции.



Какви се перспективите околу спорот за името со старо-новата влада?

Се' ќе зависи од првото мерење на популарноста на партиите. Ако ВМРО-ДПМНЕ и владата и натаму се во голема предност пред СДСМ, Груевски би можел да направи пресвртница и да го реши името. Но, ако се покаже тенденција на растечка популарност на опозицијата и знаци дека ќе следува драстична промена на политичкото расположение во државата, Груевски ќе остане на тврдите позиции. Нема да му одговара решавање на спорот затоа што тоа значи оставање чиста ситуација на политичкиот ривал Црвенковски ако дојде на власт, а Груевски ќе замине како потписник на договор за смена на името.