Хилари Клинтон во Атина
Потребно е да се изоди растојанието од „блиску до решение“ до „конечно решение“ во грчко-македонскиот спор
Од нашиот дописник
Миркица Поповиќ
Атина - Американската државна секретарка, Хилари Клинтон, вчера во Атина изрази силна поддршка Грција да продолжи со имплементирањето на новиот среднорочен фискален план. Таа ги пофали лидерскиот гест на Папандреу и новите економски мерки што, иако нема да бидат лесни за владата и за народот, сепак, се единствениот начин Грција да се врати назад на патот на економски просперитет и стабилност.
Хилари Клинтон направи сефте-средба со новиот шеф на грчката дипломатија, Ставрос Ламбринидис, откако пред еден месец тој ја презеде позицијата од Димитрис Друцас по реконструкцијата на владата на Папандреу.
Иако спорот за името бил дел од дискусијата за време на средбата меѓу Ламбринидис и Клинтон, на заедничката конференција се слушна едвај по една индиректна реченица за конкретниот проблем. Ламбринидис посочи дека државите од Западен Балкан и нивната европска иднина се главен приоритет за Грција, но и заедничка визија за Грција и Америка со цел во регионот да се задржи состојбата на мир, стабилност и безбедност.
„Наместо да се обидуваме одново да ја пишуваме старата историјата, имаме оригинална можност за да напишеме, создадеме нова историја. Треба да падне национализмот од минатото и сите држави да имаат добри врски за соработка во рамките на ЕУ“, изјави шефот на грчката дипломатија.
Во сличен дух, Клинтон индиректно, говорејќи за средбите на Папандреу и Груевски, како и за македонското прашање, спомна дека ја ценат работата на премиерот Папандреу и на грчката влада за решавање на долгогодишните спорови и внесување на државите од Западен Балкан во ЕУ и трансатлантските институции. Како што неофицијално дознаваме, ставот на САД во врска со спорот за името не е променет од она што досега го слушавме, а американската страна гледа дека двете страни се со волја и блиску до решение, но оти е потребно да се изоди тоа растојание од „блиску до решение“ до „конечно решение“.
Од она што се шушкаше во ходниците за време на средбата, САД сметаат дека две децении се предолг период за овој спор и дека неможноста по толку време и преговори да се најде решение е фрустрирачко и за двете страни, но и за другите држави, како што се САД, кои ги поддржуваат двете страни во преговорите. Проблемот меѓу Македонија и Грција за САД е „стара, долгогодишна шега“, но шега што веќе не е ни смешна и има потреба од итно решение.
Клинтон и Ламбринидис говореле за новите можности на грчката економија, за развојот на туризмот и за интересот на странските инвеститори за Грција. Вчера попладне во новиот музеј на Акропол, Клинтон, Ламбринидис и министерот за култура, Павлос Геруланос, потпишаа заеднички документ за заштита на културни артефакти со цел да се подобри борбата против нелегален шверц на археолошки предмети.
Клинтон негираше дека финансирањето на мисиите на НАТО може да биде ослабено поради економските проблеми на дел од нејзините членки, како што е Грција. Потенцираше дека се можни промени, но и дека Алијансата досега еволуирала преку вакви повремени промени.
По целодневните разговори со грчкиот државен врв, Хилари Клинтон вчеравечер, во хотелот во атинската луксузна населба Вуљагмени, навиваше за репрезентацијата на САД во финалето со Јапонија на Светското првенство во фудбал за жени. Американската државна секретарка по грчката престолнина ќе го посети Њу Делхи, за втората рунда од стратегискиот дијалог меѓу САД и Индија.
Шефицата на американската дипломатија вчера требаше да се сретне со премиерот Јоргос Папандреу, со претседателот Каролос Папуљас и со првиот човек на грчката економија, министерот за финансии, Евагелос Венизелос. За денес е резервиран термин за средба со лидерот на опозицијата, Адонис Самарас.
|
