ЕДИТОРИЈАЛ
Погрешен концепт
Жаклина Хаџи-Зафирова
Ќе профункционираат ли конечно новите технички факултети што ги најави Владата? Ќе доживеат ли целосен бум помалите места со тоа што на младите ќе им биде дадена шанса да се школуваат во своето родно место каде што ќе можат и да се вработат? Онака како што сега стојат работите, ќе биде потребно време да заживеат факултети во помалите места, бидејќи универзитетите се' уште немаат обезбедено соодветни просторни и кадровски решенија. Затоа и се' почестите критики во стручната јавност дека проектот на Владата доживеал целосен дебакл и покрај бесплатното студирање.
Проблемите со кои се соочуваат универзитетите ги негира министерот за образование и наука Перо Стојановски, кој поинаку гледа на работите. Лесно му е на министерот Стојановски да диригира со својата министерска палка и да испраќа упатства од Скопје до првите луѓе на универзитетите кои имаат реални проблеми и не знаат како да ги решат. Така се случи со Штипскиот универзитет, од каде што уште во првиот уписен рок најавија дека не знаат дали ќе постојат новите технички факултети, бидејќи за нив се пријавиле само по два-тројца заинтересирани. (За поздравување е што на другите нови факултети што ги отвори Владата имаше задоволителен одѕив.)
Што сега со шеесетината студенти кои се запишаа на трите технички факултети, Електротехничкиот во Радовиш, Машинскиот во Виница и Технолошко-техничкиот во Пробиштип. Тие не знаат каде ќе им почне наставата, која е најавено да стартува денеска, бидејќи од Штипскиот универзитет ја најавија можноста тие во првите две години да студираат во Штип на студиите за политехника. А, како што рече ректорот на штипскиот универзитет Саша Митрев, „ако се создадат подобри услови за активирање на техничките факултети, ќе можат да се префрлат во трета година на саканите студиски програми“. Тоа, со други зборови, значи дека факултетите ќе се приклучат со Штипскиот универзитет, иако ректорот ретерираше во својот став, објавувајќи дека новите технички факултети ќе се отворат, но не кажа каде.
Се' уште не се знае ни кога ќе профункционираат зградите каде што треба да бидат сместени новите факултети - Електротехнички во Радовиш и Машински во Виница. Неизвесно е и кога министерот ќе ја одобри листата на професорите кои треба да предаваат на новите факултети. Прашање е и што ќе се случува со десетината студенти кои се запишаа на новиот Технолошко-технички факултет, кој годинава битолскиот универзитет „Св. Климент Охридски“ го отвори во дотрајаното велешко училиште „Јордан Хаџи Константинов - Џинот“. Овој факултет се' уште не е официјално отворен оти се чека да пристигне новиот инвентар, а просториите се уште заклучени.
Министерот за образование и наука Перо Стојановски го лути тоа шт�� новинарите известуваат за аномалиите и слабиот интерес на новите технички факултети. Го лути и тоа што новинарите ја пренесоа веста дека токму поради слабиот интерес студентите на новите технички факултети ќе треба да учат во Штип, како што објаснија надлежните. Го лути и што објектите за новите технички факултети се празни. Но, никој не му е виновен на министерот што фактите зборуваат нешто поинаку од она што тој постојано и' го пласира на јавноста како „друг концепт“. „Многу е лошо наспроти еден концепт кој се покажа како успешен и кој покажа дека 78 проценти од средношколците го продолжија своето образование на мала врата да се турка еден друг концепт со кој сакаат да се демотивираат учениците да го продолжуват своето високо образование“, вели министерот Стојановски, на кој му стана навика на прес-конференции работите да ги илустрира спротивставувајќи два концепта.
Одговорните ќе треба да си го постават прашањето што го поставија и упатените, а тоа е недостигаше ли темелна анализа за новите факултети и дали се направија лоши процени за проектот. Ова важи и за министерот за образование, на кого не му прилега да ги игнорира новинарите, да ги спречува да поставуваат прашања (како што е со новинарот на „Утрински“), а уште помалку демонстративно да напушта прес-конференции на кои тој е домаќин! |
