Битката не се води на улица

СТРУМИЦА - „Битката за тутунот и за цената се води на вага, а не на улица“, изјави министерот за земјоделство, шумарство и водостопанство, Љупчо Димовски, вчера од Струмица. Тој смета дека блокирањето на откупот на тутунот не е во интерес на тутунопроизводителите и оти е мотивирано од политички побуди и партиски интереси.

„Во Прилеп не разговарав со тутунопроизводители, туку со членови на политички партии. Завчера беа погазени достоинството и честа на тутунопроизвoдителите. Министерството и Владата секогаш ги штитат интересите на земјоделците и не се занимаваат со профитерство и калкулации, туку со остварување на интересите на непосредните земјоделци“, нагласи Димовски. Според него, тутунот заслужува да биде соодветно вреднуван. „Ќе се обидеме со откупувачите на тутун да издејствуваме враќање на ланските цени или на приближно ниво што ќе биде задоволство за тутунарите“, додаде Димовски. Тој нагласи дека се отворени уште 84 откупни пункта.

„На второстепените комисии во подрачните единици им се дадени инструкции за нова процена на тутунот во случај да се јави производител што смета дека е оштетен“, појасни министерот Димовски. (Д.Р.)