Не даваат тутун за џабе

Бараат откупна цена од најмалку 192 денара за килограм

Моника Талеска


ПРИЛЕП - Околу 300 тутунопроизводители, или десет пати помалку споредено со претходниот ден, вчера ги продолжија блокадите на излезот од Прилеп на патот за Градско. Тие протестираа три часа, од 10 до 13 часот, изразувајќи го незадоволството од откупната кампања годинава, но и од неостварените барања адресирани до Министерството за земјоделство.

„На тутунарите што се вработени во јавни претпријатија им е вршен притисок за да не се појавуваат на блокадите. Затоа и бројот на земјоделците што вчера штрајкуваа е значително намален. Но, без оглед на сите заплашувања, ние нема да отстапиме од нашите барања за повисока откупна цена од најмалку 192 денара за килограм и отворање на сите откупни пунктови во регионот“, вели Кире Неделковски, претседател на Иницијативниот одбор на тутунарите.

Производителите доцна синоќа во Владата имаа закажано средба со високи владини претставници, но, како што изјавија, доколку не им се остварат барањата, тие и денеска од 10 часот ќе продолжат со блокадите не само на патот за Градско,туку и на други витални патни правци во регионот.

Некои тутунари од Долненско вчера реагираа дека не знаат што, всушност, се случува, но оти им се вршат секакви притисоци за да го прекинат штрајкот.

Во Прилеп беа отворени вратите за откуп на реколтата во Тутунскиот комбинат, Алијанса и „Центро табак“ од Велес, но медиумите единствено имаа пристап до откупното место на велешкиот откупувач.

Но, откуп речиси и нема. Мал број производители чекаа пред откупните места за да дознаат по која цена се предава тутунот, по ветувањата на министерот дека ќе се заложи да се остварат барањата на тутунарите. Во откупната станица во Тутунскиот комбинат еден производител изјави дека е задоволен од откупната цена.

„Го предадов тутунот. Одлично го проценија. Постигнав цена од околу 182 денара. Јас сум задоволен“, изјави Наум Божиноски.

Но, други производители, очевидци на процената на реколтата, велат дека станува збор за монтирани случаи.

„Најверојатно, имаат договор со некои тутунари да ги носат само високите класи за да се добие впечаток дека се откупува по висока откупна цена, што не е вистина“, рече Љупчо Димов.

Тутунарите што, преку затворени стаклени врати на откупниот пункт на Алијансата, го следеа откупот не се задоволни од процената.

„Не смее да се дозволи по овие цени да се врши откуп. Лани тутунот беше со многу понизок квалитет, а го проценија 200 денари. Годинава нудиме неспоредливо подобар квалитет, а сакаат да го откупат за 140 денари. Срамота е тоа“, реагираа неколкумина производители.