Насловна

Шекеринска бара поддршка од неопределените

Во обраќањата на митинзите на СДСМ во неколку скопски општини, кандидатката за премиер вети одговорна влада

Радмила Шекеринска, кандидатка на опозицијата за премиер, побара поддршка од неопределените гласачи. На митинзите што коалицијата на СДСМ прексиноќа ги одржа во неколку скопски општини, таа оцени дека на Македонија и' треба влада што ќе обединува и нема да бега од одговорност.

„Ја барам вашата доверба, ја барам довербата на сите неопределени граѓани за таква влада, за влада од сите и за сите. Ја барам довербата од сите на кои им е смачено од политичари што повеќе ги мразат своите противници отколку што си ја сакаат својата земја. Да ставиме крај н�� таа политика“, рече Шекеринска.

Таа се повика на искуство како вицепремиерка за евроинтеграции:„Јасно им е дека по тие четири години мандат можам да застанам пред вас со чист образ и со високо крената глава и да ви кажам дека ќе работам Македонија да биде чесна, да има чесна влада и тие знаат дека македонската јавност ќе ми верува“.

Лидерот на СДСМ, Бранко Црвенковски, пак, алудирајќи на честите коментари на власта за случувањата и за состојбите во опозицискиот табор, иронизирајќи го нарече премиерот Никола Груевски „реформатор светски“ и му порача дека на 5 јуни граѓаните без страв ќе решаваат за својата и за судбината на државата.

„Па, ајде реформатору светски, кажи ни кој да ни биде претседател во партијата, кој да ни биде кандидат за премиер, кои да ни бидат потпретседатели... Издиктирај ни ја изборната програма за да биде СДСМ таков каков што ти мислиш дека треба. Па, СДСМ не е тука за да ти прави ќеф, туку за да те порази“, му се обрати Црвенковски на Груевски.

На митинг во Шуто Оризари социјалдемократите ветија зголемување на социјалната помош за 40 проценти, намалување на казните за граѓаните, олеснување на процедурата за добивање патна исправа и лична карта, изградба на средни училишта...

„Ние нема да ги собираме парите од вашите џебови за да градиме лавови и златни мостови во центарот на Скопје. Срамота е само на неколку километри од вас да има пари за плажа, а овде да нема пари за ништо“, рече Шеќеринска. Претседателот на ПЦЕР, Самка Ибраимовски, вети дека кога ќе стане пратеник соодветно ќе се користат средствата наменети за декадата на Ромите и оти ќе направи се' за враќање на достоинството на овие граѓани.

Опозиционерите апелираа до жителите на оваа скопска општина масовно да излезат на гласање, а Црвенковски ги посоветува да не го продаваат гласот за една вреќа брашно. (П.Р.)