Насловна

Груевски: Сакаме да си го зачуваме образот!

Лидерот на десницата од Гостивар и од Тетово порача дека повторно ќе победат бидејќи работеле чесно и одговорно

Оливера Војновска



Насмеаниот лик на американскиот претседател Барак Обама е прва работа што му го привлекува вниманието на намерникот при посетата на Гостивар. Огромното пано не е дел од изборниот декор, туку се надвисува над локалот на еден гостиварец, кој, веројатно, импресиониран од американскиот лидер, својата кафетерија ја нарекол „Обама“. И во сенка на оваа реклама паѓаат ликовите на главните јунаци во Шестата изборна единица - гостиварскиот градоначалник и лидер на НПД, Руфи Османи, лидерот на ДУИ, Али Ахмети, и Роза Топузова-Каревска од ЛДП, билбордот на ДПА со порака „Дојдете со нас“. Како и огромните платна (банери) поставени над главната улица на кои се испишани изборните слогани на ДПА, на НДП- „Да ја вратиме гордоста“, на ДУИ - „Заедно право кон целта“, на ВМРО-ДПМНЕ - „Реформите ќе победат“ и на СДСМ - „За твојата иднина“.

Деновиве Гостивар и Тетово, како и сите други места во државата, ја живеат изборната сага. Таму вчера беше особено живо, митингуваше владејачката ВМРО-ДПМНЕ. На плоштадите трештеше музика еден час пред почетокот на митинзите. Атмосферата ја загреваа познати имиња од македонската музичка сцена. За дел од присутните (оние што беа поблиску до бината) собирите беа можност да се фотографираат со нашите музички ѕвезди, особено со младиот Влатко Илиевски.

На митинзите беа собрани неколку илјади луѓе, претежно партиски членови и симпатизери. Имаше и такви што беа дојдени од љубопитност, некои, пак, за да гледаат сеир, а за некои ова беше „културно-забавен настан“, па по завршувањето на музичкиот дел си заминуваа.

Според сценариото, на бината се редеа пејачи, а настапот на Владо Јаневски со „Земјо македонска“ беше најава дека наскоро ќе се појави лидерот на ВМРО-ДПМНЕ, Никола Груевски. Тогаш атмосферата се вжешти и кулминацијата се случи кога Сузе Спасовска ја испеа „Слушајте Македонци, чувајте го името!“ Во момент кога се разлеаја стиховите: „Оган да го гори тој што ќе ми збори да те оставам Македонијо. Каде да сум таков сум, не се давам никому да ме крсти, прекрстува“, на плоштадот пристигна Груевски.

Премиерот синоќа, прво во Гостивар, а потоа и во Тетово, порача дека коалицијата предводена од ВМРО-ДПМНЕ повторно ќе ја однесе победата на изборите. „Тоа ќе се случи затоа што четири години работевме чесно и гледавме да не го лажеме народот. Сакаме да си го зачуваме образот и во наредните четири години да докажеме дека секогаш сме биле со и меѓу народот. Нема да останам мирен додека не видам дека се реализираат сите 1.200 проекти“, рече Груевски. Според него, „Манифестот“ на ВМРО-ДПМНЕ го има духот на Крушевскиот манифест од 1903 година.

И носителот на изборната листа во Шестката, Никола Тодоров, нагласи дека биле одговорна власт: „Стоиме пред вас со ’Манифестот‘ во едната рака и со ’Отчетот‘ за сработеното во другата“, рече Тодоров.

Митингот заврши со раскошен огномет во кој како да „стежне“ пораката: „Дај Боже во мир да ги завршиме овие избори!“, што од Тетово ја испрати на претседателката на ДОМ, Лилјана Поповска. Неа, инаку, младиот водител ја претстави како „вистинско освежување на македонската политичка сцена“, веројатно, не знаејќи дека Поповска е присутна во политиката речиси две децении.