Владата пропагира домашни производи, а купува странски

Веќе два месеца специјалците од МВР добиваат ланч-пакети за терен во кои нема домашен производ

Македонските полициски специјалци, наспроти кампањата на Владата „Купувајте македонски производи“, за теренска работа добиваат дневни пакет-оброци од увоз. До пред два-три месеци состојбата била поинаква и „јаделе македонско“, но сега во спакуваниот оброк, наречен ЕКО-3, а ниту еден од над десетина производи не се од домашни производители!

Врвот на Министерството за внатрешни работи се погрижи на специјалците да им обезбеди богата понуда на производи, сите увезени од Хрватска. Бидејќи станува збор за реномирани производители, во прашање не се доведува квалитетот на продуктите, туку само се потврдува дека парите што Владата ги дава за реклами се попусто фрлени. И самата ниту ги слуша ниту ги применува.

Во богатата лепеза производи во ланч-пакетот на специјалците има се' - од говедски гулаш, мисиркино месо, пилешка паштета (сите на „Подравка“), витамински инстант-напитоци, инстант црн чај, мед, слатки, чоколада, освежителни марамчиња, па дури и „кавабон“. Сите производи се хрватски, со исклучок на „ананасот во коцки“, кој е од Тајланд, но Хрватска е увозник. На секој производ точно се посочени и калориите, за секој специјалец да знае што и колку внесува во организмот. Очигледно, МВР не штедело на ништо.

Пред точно две недели од портпаролот на МВР, Иво Котевски, побаравме информации дали за набавка на ланч-пакети бил распишан тендер, колку понудувачи се јавиле, имало ли меѓу нив и македонски фирми и колку чини еден ваков оброк.

Побара прашањата што не' интересираат да испратиме во електронска форма, со ветување дека многу брзо Министерството за внатрешни работи ќе ни одговори, но од повратни информации нема ни абер. (Б.Ј.)