Струмица ќе се гасифицира со свои пари

Проектот чини 3,8 милиони евра, а ќе се реализира во средината на 2011

СТРУМИЦА - Градоначалникот Зоран Заев и официјално го повлече барањето за кредит од Светска банка за финансирање на проектот за гасификација. Струмица ќе се гасифицира и без согласност од Министерството за финансии. Ваквата одлука ја донесе Заев откако владиниот ресор тактизираше 11 месеци, односно не даде ни позитивен ни негативен одговор по барањето за кредитно задолжување. Општината има висок кредитен рејтинг и ги исполнува сите законски услови и критериуми за задолжување.

Проектот чини 3,8 милиони евра. Од овој износ, 2,8 милиони евра требаше да се обезбедат преку кредит од Светска банка, а другите да се покријат од општинската каса. Сега, со повлекувањето на барањето, за гасификација ќе се инвестираат општински средства.

„Исклучиво политички се причините зошто Струмица не добива ваква согласност. Но, резилот и срамот нека останат на оваа Влада, на Министерството за финансии. Струмица е во Македонија, а овој прекрасен проект останува за потребите на струмичкото стопанство, граѓаните, јавните институции. Тоа е добро, бидејќи е одличен пример за да се имплементира и во другите општини. Додека Европа се бори за вакви објекти, ние, во Македонија, за жал, лечиме политички комплекси. Во секој случај, ќе посегнам по изменување и дополнување на законот за оваа работа, тие процедури ќе течат, но Струмица нема да дозволи од политички причини да застане во својот развој. Ние ќе го изградиме гасоводот, со сето она што струмичкото стопанство како финансиска сила го генерира и за нашиот буџет. Се надеваме дека во средината на идната година гасот ќе протече во Струмица“, вели градоначалникот Зоран Заев.

Првиот човек на Струмица смета дека Владата намерно одолжува со давањето согласност за да се истрошат средствата од Светската банка, кои се многу поволно кредитна линија, за на крајот да даде позитивно мислење кое повеќе нема да и' врши работа на Струмица. Барањето за добивање согласност до Министерството за финансии било испратено на 10 јануари оваа година. Во меѓувреме, биле доставени дополнителни информации што ги барал надлежниот ресор, иако според Заев, не биле потребни. Но, и оттогаш поминале пет месеци без Министерството да соопшти каков било став по поднесеното барање.

Токму од овие причини, општината реши сама да го гради гасоводот во должина од 13 километри. Кон крајот на октомври ќе биде распишан тендер за избор на изведувачот и во јули идната година гасот веќе треба да го има во Струмица.

„Во буџетот за 2011 година проектираме сопствени средства, со цел сами да ја изградиме гасоводната мрежа и ги поставиме двете станици за декомпресија на гасот. Наместо да инвестираме во компресија на гасот во Бугарија и во целиот транспортен систем, ќе одиме по системот на увоз на гас што, најверојатно, и ќе ја зголеми цената за 2-3 денари. Но, сепак, е многу поевтин од кој било друг енергенс. Ќе се заштеди во стопанството, јавните институции, земјоделството и домаќинствата“, објаснува струмичкиот градоначалник. (Е.П.)