Недостасуваат учебници по албански

Гојко Ефтоски


ТЕТОВО - Наставници од повеќе основни и средни училишта во Тетово алармираат за недостиг од учебници по албански јазик, а истовремено бараат и повлекување на одредени книги поради содржински недостатоци. Овие забелешки се адресирани до Секторот за јавни дејности на Општина Тетово, а ќе бидат проследени до Министерството за образование и до Владата.

Таков е случајот со учебниците по музичко воспитание за вишите одделенија на албански јазик за кои се вели дека „немаат ниеден елемент од албанскиот фолклор и култура, односно нема ниедна албанска песна“. Ист е ставот за учебниците по географија и по историја за средно гимназиско образование.

„Во учебникот по географија картите и топонимите се на македонски јазик, содржат терминолошки недостатоци, додека во историја не се споменува албанскиот народ и неговата култура и традиција“. Овие забелешки вчера на прес-конференција ги презентираше Илјаз Халими, раководител на Секторот за јавни дејности н�� Општина Тетово. Тој додаде дека во четири основни училишта недостасуваат учебници на албански наставен јазик.

Во нижите одделенија има недостиг на учебници по предметите: англиски јазик, албански јазик, запознавање на околината, музичко, ликовно, физичко и здравствено воспитание, природни науки и македонски јазик. Во други пет основни училишта има недостиг од учебници на албански јазик за вишите одделенија по предметите: математика, македонски јазик, англиски јазик, хемија, географија и биологија. Во шест училишни средини нема учебници по англиски јазик, математика, историја, информатика, техничко образование, природни науки и запознавање на општеството. Слична е ситуацијата во две училишта во Тетово каде што наставата се изведува на турски јазик. Учебници недостасуваат по германски јазик, англиски јазик и историја за седмо одделение во две училишта каде што наставата се изведува на македонски јазик.

„Неадекватен превод од македонски на албански има во учебниците за албански. Таков е случајот со книгите по музичко, ликовно, запознавање на природата, географија, математика, историја кои се од македонски автори и со содржина од македонската култура. Без ниеден пример за соживот, меѓуетнички и меѓуконфесионални односи е учебникот по етика за шесто одделение, чиј автор е Македонец. Учебникот по запознавање на религиите за петто одделение на албански јазик е превод од македонски и од 21 наставна содржина, само во пет поглавја се зборува за исламот. Другите се за христијанството и за јудеизмот. Учебниците по запознавање на околината и македонски јазик не се оние за кои се определиле наставниците“, нагласува Халими.