Со пиштол-плашливец им се заканувал на лекари

Скопјанец го нападнал обезбедувањето во Дневната болница за зависности при Клиничкиот центар во Скопје и со пиштол-плашливец им се заканувал на лекарите, бидејќи одбиле да и' ги дадат лекарствата на неговата мајка.

Според полицискиот билтен, инцидентот се случил завчера околу 9 часот кога 24-годишниот Д.Ј. телефонски бил известен дека неговата мајка не може да ги добие лекарствата што биле наменети за него, туку дека треба лично да ги земе.

„Најпрвин се заканувал, а потоа отишол на клиниката. Носејќи пиштол во раката, почнал да им се заканува на обезбедувачите, а потоа и физички ги нападнал. Почнал да им се заканува и на лекарите, по што бил совладан од обезбедувањето“, објаснуваат од МВР. Дури тогаш забележале дека скопјанецот им се заканувал со пиштол-плашливец, по што бил приведен во полициска станица. Против него ќе биде понесена кривична пријава. (Х.Р.)