Поглед

Лекар без граници

Бујар Османи, министерот што треба да се грижи за здравјето на нацијата, во напад на лутина го раскина договорот со фирмата „Хацат“, која го снабдува Клиничкиот центар со храна. Министерот удри со рака по масата, извикувајќи: „Вака не може! Не смее никој да го прекине снабдувањето со храна на болните пациенти“.

Во оваа Македонија, држава со изместени или никакви вредности, министерот за здравство дури и ќе најави кривична пријава против фирмата „Хацат“ оти еден ден не ја испорачала храната за болните. Но, кој да му поднесе кривична пријава на министерот Османи затоа што не и' плаќа на „Хацат“ за храната што таа ја испорачува. Како не му е срам на Османи да најавува кривична пријава за фирмата на која и' должи еден милион евра.

Што сакаат овие наши министри. Сите во државава да работиме ударнички и бесплатно за тие да се прикажуваат како успешни министри. Можеби Бујар Османи посакал да помине низ шпалир на болните пациенти, лекари и сестри кога тие од скопските ресторани добиваа храна, која „Хацат“ не ја испорача бидејќи договорот му беше експресно раскинат и да слушне милозвучни аплаузи.

Тоа е филозофијата – обвини ги другите за она што си неспособен да го направиш. Умираа новороденчиња повеќе од каде било во регионот – тоа не било проблем; паѓаа покриви и убиваа луѓе – и тоа не било проблем, покривот го реновирала претходната власт; болните немале храна – и тоа не бил проблем на министерот, виновна е фирмата што е на издишување затоа што државата не и' плаќа.

Османи секој ден се појавува на телевизија и веројатно мисли дека колку повеќе си присутен во јавноста, толку можеш да ја освоиш. Но, тој медал има и друга страна – значи, има многу проблеми во ресорот што го водиш, а не знаеш како да ги решиш.