Македонија доби заклучок место преговори

Брисел – Шефовите на држави и на влади на ЕУ го потврдија заклучокот за Македонија според кој земјата ги исполнила политичките критериуми, но на препораката за почнување преговори со ЕК ќе се наврати за време на идното, унгарско претседателство.

„Продолжувањето на добрососедските односи, вклучувајќи и заедничко прифатливо решение за прашањето за името под покровителство на ОН е од суштинско значење. Советот го поздравува воспоставениот дијалог на високо ниво меѓу Македонија и Грција и очекува тој наскоро да донесе резултати“, стои во заклучокот.

Советот го поздравува постигнатиот прогрес забележан во извештајот на ЕК, како и исполнувањето на одредбите од Спогодбата за стабилизација и асоцијација. Од Македонија се бара да продолжи со реформите и борбата против корупцијата. Области во кои се потребни дополнителни напори се политичкиот дијалог, судството, јавната администрација, слободата на изразување и подобрување на бизнис-климата. Охридскиот договор се посочува како клучен елемент за демократијата и владеењето на правото во земјата.

Унгарија, која од 1 јануари 2011 го презема претседавањето со ЕУ, ќе биде четвртата земја на која и' се остава во нејзиниот претседавачки мандат да се расправа за одредување датум за старт на преговорите со Македонија. Претходно, Шведска, Шпанија и Белгија, и покрај декларативните заложби, не успеаја да постигнат прогрес за ова прашање

Спротивно од Македонија, лидерите на ЕУ и' дадоа кандидатски статус на Црна Гора, која ќе стане петта држава официјален кандидат за членство во Унијата, по Хрватска, Македонија, Турција и Исланд.