„Здраво, Маријо!“ - нов албум на Северина
Контроверзната хрватска пејачка и актерка Северина, конечно, ги откри деталите околу новиот албум на кој работеше речиси две години заедно со Горан Бреговиќ и Марина Туцаковиќ, кој е насловен „Здраво, Маријо!“ Таа го опишува, пред се', како женски албум за кој објаснува дека е сниман на поинаков начин од претходните.
Имено, кога се снимале вокалите, таа веќе ги знаела текстовите напамет, така што во снимањето можела да внесе повеќе искрени емоции или, како што вели самата, женски искрени емоции.
„Новото цеде донесува десет мелодиски и текстуално зрели песни кои ги опишуваат различните женски чувства. Ќе има веселење, тага, но не и патетика“, изјави Северина.
Зад музиката е потпишан Горан Бреговиќ, а текстовите се на Марина Туцаковиќ. „Тоа ќе биде албум на возрасна жена, со песни какви што сакам, а не да излезам будала правејќи се помлад отколку што сум. Сите пејачки сакаат да изгледаат како да имаат 12 години“, изјави Бреговиќ.
Албумот е предвидено да излезе на 6 мај како издание на „Далас рекордс“. |
