Претходен број

Дијалог Македонија - ЕУ во Брисел

Уверувања дека ЕУ ја поддржува нашата европска перспектива, но во заклучоците Македонија не се препознава

Од нашиот дописник
Слободанка Јовановска

Брисел - Две години пред истекувањето на Спогодбата за стабилизација и асоцијација, Македонија се' уште нема датум за преговори со Европската унија. Ни тој факт вчера не беше доволен да се најави нешто поконкретно од состанокот на високо ниво на министрите Антонио Милошоски и Ивица Боцевски со еврокомесарот Оли Рен и францускиот претставник Жан Пјер Жује од европска страна. На состанокот што се одржа паралелно со министерската средба во Брисел, беше претресено се' што е постигнато од Спогодбата досега, при што беа повторени забелешките од ноемврискиот извештај на ЕК, со ставање на преден план на исполнувањето на условите околу визите, за да има барем нешто охрабрувачко од Унијата годинава.

Состанокот се одржа доцна синоќа така што не беше познато дали Македонија ќе влезе конечно во втората фаза од исполнувањето на ССА или и за тоа треба да дојдат подобри времиња. Засега, стигнаа уверувањата дека ЕУ цврсто ја поддржува нашата европска перспектива, но во заклучоците од министерската средба, кои се подготвуваат за самитот неделава, Македонија воопшто не се препознава, бидејќи фокусот е на земјите што треба да добијат кандидатски статус, за да може Брисел да каже дека Балканот прави чекор напред.

Инаку, во завршниот документ од состанокот, кој „Утрински весник“ го објави, ЕУ бара фер и слободни избори во март како услов за Македонија да очекува прогрес во евроинтеграцијата, а од Владата, парламентот и од претседателот да функционираат и да соработуваат поефективно, што во превод значи подобра кохабитација, престанување со бојкотите на Собранието, повеќе слух за улогата на опозицијата и крај на масовното усвојување закони по ургентна процедура. Политичарите, поточно политичките партии, се на удар на критика и во делот на корупцијата, каде што како проблем се нагласува финансирањето на партиите и на изборните кампањи, нешто што се повторува од извештај до извештај, а нема видливи напори да се реши. Донесувањето на Законот за јазиците е оценето како значаен чекор напред, но и натаму се бара подобро интегрирање на Албанците во образованието, спречување на етничките тензии во училиштата и подобрување на застапеноста на претставниците на помалите заедници, како што се Турците и Ромите. Владата е пофалена што одговори веднаш на сугестиите на ОБСЕ и на ОДИХР околу изборите и што прекршителите на инцидентите ги исправи пред правдата. Исто така, позитивно се оценети судските реформи, иако и натаму се очекува јакнење на структурата на судството, борбата против корупцијата во царината, успешното собирање на даноците и пресметката со прекуграничниот криминал.

Голем дел од заклучоците е посветен на визите, при што оцената е дека Македонија успешно ги имплементира договорите за реадмисија, дека покажува прогрес во полициската соработка, во борбата против организираниот криминал, во миграцијата, азилот, визната политика и менаџирањето на границата. Сепак, како проблем се посочува политизацијата на високите позиции во полицијата, недоволниот административен капацитет во оваа сфера и фактот дека и натаму е загрижувачки организираниот криминал во земјата. За спорот околу името ставот е познат и нема што ново да се каже освен дека и натаму се поставува како пречка од страна на Брисел на патот на Македонија за добивање датум, иако формално не стои така, ниту некој би го потврдил тоа.

Пред состанокот на Советот за стабилизација и асоцијација, министерот Боцевски имаше средба со еврокомесарот за мултијазичност Виктор Орбан на која му пренел дека јазикот е прашање на идентитетот и не може да се менува тукутака.